X halyqaralyq «Bastaý» kınofestıvali 2022 jyldyń 29 qarashasy men 3 jeltoqsany aralyǵynda ótedi.
«Bastaý» halyqaralyq stýdenttik jáne debúttik fılmder festıvali aıasynda qandaı kartınalar kórsetiletini belgili boldy, dep habarlaıdy Almaty-akshamy.kz.
Otandyq kıno seksıasynda Asqar Uzabaevtyń «Baqyt» fılmi kórsetiledi. Aıta ketsek, turmystyq zorlyq-zombylyq máselesin kóteretin týyndy jyl basynda 72-shi Berlın kınofestıvaliniń "Panorama" baǵdarlamasynda bas júlde – kórermender syılyǵyn jeńip alǵan edi.
Sondaı-aq kórermen nazaryna Ulttyq kınony qoldaý memlekettik ortalyǵynyń kómegimen túsirilgen Ádilhan Erjanovtyń «Ademokany oqytý» jáne Qazaqstan men Reseı kınogerleriniń birlesken «Tarlan» fılmderi de kórsetiledi.
X Halyqaralyq «Bastaý» stýdenttik jáne debúttik fılmder festıvaliniń tolyqmetrajdy fılmder baıqaýyna Eldar Shıbanovtyń «Taý jýasy» debúttik fılmi qatysady.
2021 jyly bul fılmniń jobasy baıqaýdy ótkizgen Italıanyń Mádenıet mınıstrliginiń qoldaýymen qurylǵan Venesıa bıennalesindegi kınozerthana - Biennale College Cinema konkýrsynyń fınalısi boldy. Al 2022 jyldyń qyrkúıeginde áıgili Venesıa kınofestıvalinde onyń álemdik premerasy ótti.
Rejıserdiń ózi moıyndaǵandaı, ol óz kartınasynda múldem basqa Qazaqstandy kórsetkisi kelgen. Kınokartınada aýylda turatyn hıpster otbasynyń, tas jolda taý jýasymen saýda jasaıtyn jáne ata-analaryn tatýlastyrý úshin Qytaıǵa baratyn balanyń oqıǵasy baıandalady.
Sondaı-aq derekti jobalardyń konkýrstyq baǵdarlamasyna qatysatyn Vıktor Vılkovıskııdiń «Teńizdiń oralýy» ǵylymı-derekti fılmi kórermenderge Aral teńizi jaıly aqparat alýǵa múmkindik beredi.
Al «Bastaý» festıvaliniń jabylýynda Mádı Baljanovtyń «Sútti qyz» tolyqmetrajdy debúttik fılmi kórsetiledi. Bul - romantıkalyq komedıa, búginde synshylar ony «Qazaqstannyń Amelıi» dep te atap ketken. Sońǵy eki fılm de Kınoortalyqtyń qoldaýymen túsirilgen.
Kınofestıvaldi Almaty qalasy ákimdiginiń qoldaýymen Tanaris Production kınokompanıasy uıymdastyrady. Festıvál seriktesteri: Mádenıet jáne sport mınıstrligi, T. Júrgenov atyndaǵy Qazaq ulttyq óner akademıasy, «Turan» ýnıversıtetiniń Turan Film Academy joǵary mektebi jáne ál-Farabı atyndaǵy Qazaq ulttyq ýnıversıteti.
Festıválge «Habar», «Almaty», STV jáne Qazaqstan telearnalary, «Eldoradıo» radıosy, «Tengrınús» jáne Lifestyle portaldary, «Egemen Qazaqstan», «Kazahstanskaıa pravda», «Antena Kazahstan», «Novaıa gazeta», «Almaty aqshamy», «Vechernıı Almaty», «Argýmenty ı fakty Qazaqstan» gazetteri, Massaget.kz portaly, «Ekspress K», «365 Info», Orda.kz jáne Kazakh24.info saıttary aqparattyq qoldaý kórsetedi.