Almatylyqtar «Ońaı» kólik kartasyn 2015 jyldyń qazan aıynan bastap, qoldanyp keledi.
Dese de, kún saıyn lyq toly avtobýstarmen qatynap, jol azabyn kórip júrgen almatylyqtar úshin jolaqysyn tóleýge arnalǵan jeńil ári túsinikti «Ońaı» júıesiniń ózin jetildirý artyq bolmas.
Bul júıe eń aldymen qoǵamdyq kólikte tólemnen túsken qarjynyń kóleńkeli aınalymǵa túsip ketpeýin kózdedi. Sondaı-aq búdjetke salyq túsimin arttyrý úshin engizildi. Sodan beri jol júrý aqysy qolma-qol aqshamen emes, karta arqyly tólene bastady. Jolaýshylardyń ózderi muny tıimdi dep sanaıdy. Qoǵamdyq kólikte jol aqysyn mobıldi qosymsha arqyly da tóleýge bolady. Alaıda ony smartfonǵa júktemes buryn, jolaýshy aldymen karta satyp alýy kerek. Áıtpese tólem jasaı almaısyz. Osy istiń basy-qasynda júrgender kóp uzamaı bul máseleni de sheshemiz dep ýáde berip otyr, dep habarlaıdy Almaty-akshamy.kz 24.kz-ke silteme jasap.
«Qazir biz osyǵan qatysty jańa ónimdi sońǵy synaqtan ótkizýge ázirlep jatyrmyz. Iaǵnı vırtýaldy karta bolady. Endi qala turǵyndary men qonaqtary burynǵydaı karta izdep, sabylmaıdy. Tipti onyń qajeti bolmaıdy. Jolaýshylar jaı ǵana qosymshany júktep alsa, jetkilikti. Jolaqysyn kartasyz, mobıldi qosymsha arqyly tólep júre beredi. Bul óte yńǵaıly bolady dep oılaımyn», - deıdi "Ońaı" kólik holdıńiniń jobalaý-saraptama bóliminiń basshysy Álibek Qalabaev.
Dese de, «Ońaıǵa» almatylyqtardyń báriniń birdeı kóńili tolmaıdy. «Máselen, qosymshany ázirleý barysynda zaǵıp jandardyń suranysy eskerilmegen», – deıdi Dáýren Báshenov.
«Qosymshany zaǵıptar men kózi nashar kóretin adamdar qoldana almaıdy. Bizge múldem qoljetimsiz. Bul qala ishinde júrýge úlken kedergi. Óıtkeni aıaldamaǵa qandaı kólik kele jatqanyn bilýge múmkindik joq», - deıdi qala turǵyny Dáýren Báshenov.
Zaǵıptar qosymshada daýystap aıtyp beretin nusqaýlyq bolýyn qalaıdy. Osyǵan qatysty kólik holdıńine birneshe ret ótinish túsirgenimen, tushshymdy jaýap ala almapty.
«Bul tehnologıalyq turǵydan kúrdeli ónim sanalady. Sondyqtan jyldam daıyn bolmaıdy. Qashan ázir bolatynyn anyq aıta almaımyn. Bul másele bizdiń nazarymyzda. Qazir zertteý jumystary júrgizilip jatyr», - deıdi "Ońaı" kólik holdıńiniń jobalaý-saraptama bóliminiń basshysy Álibek Qalabaev.
Alaıda qoǵamdyq avtobýstar men troleıbýstarda qolma-qol tólem jasaıtyndar áli de kezdesedi. Iaǵnı jolaýshylardyń birqatary saralanǵan tarıf boıynsha tóleýge májbúr. Qolma-qol aqshamen jol júrý baǵasy 150 teńge, al kartany paıdalansa nemese SMS pen QR-kod arqyly tólese - 80 teńge.