Sońǵy jyldary konsýltatıvtik-dıagnostıkalyq qyzmetterge suranys artqan. Oǵan ótken 9 aıdyń ishinde qor 18 mlrd teńge jumsaǵan.
Bul týraly Medısınalyq saqtandyrý qory Almaty qalalyq fılıalynyń dırektory Tileýhan Ábildaev aıtty, dep habarlaıdy Almaty-akshamy.kz
Sonymen qatar, MÁMS quny qymbat operasıalardyń da shyǵynyn jabady.
«Saqtandyrý qarajaty esebinen kardıohırýrgıa, neırohırýrgıa, ýrologıa, travmatologıa, hırýrgıa, onkologıa, LOR profılderi boıynsha júzdegen ota jasalyp jatyr. Mundaı bir otanyń quny birneshe mıllıonǵa deıin jetip jyǵylýy múmkin. Mysaly, osy jyldyń 9 aıynda bir ǵana Almaty boıynsha 1300-den astam kardıohırýrgıalyq operasıa jasalyp, oǵan qor tarapynan 5,7 mlrd teńge tólendi. Neırohırýrgıalyq profıl boıynsha 548 operasıa jasalǵan. Oǵan 2,9 mlrd teńgeden astam qarjy tólendi», - dedi Tileýhan Ábildaev.
Búginde tize, jambas býyndaryn almastyrý operasıalaryna degen suranys ta joǵary.
«Mysaly, osy jyldyń 9 aıynda 240-tan astam býyn almastyrý operasıasy jasalyp, oǵan 438,5 mln qarjy tólendi. Sonymen qatar, Almaty qalasynda qańtar-qyrkúıek aralyǵynda jalpy quny 441 mln teńge turatyn 70-ten astam transplantasıa jasaǵan. Olardyń ishinde 18 baýyr-búırek almastyrý operasıasy da bar. Osynyń bári saqtandyrý qory arqyly kórsetilip jatqan qyzmetter», -dedi fılıal basshysy Tileýhan Ábildaev.