Qalada 32 jataqhana jumys isteıdi.
Bul derekti ÓKQ alańynda ótken brıfıńte Almaty qalasy bilim basqarmasynyń basshysy Lázzat Jylqybaeva keltirdi, dep habarlaıdy Almaty-akshamy.kz
Spıker málimetinshe, Almatyda barlyǵy 85 kolej jumys isteıdi, onyń ishinde 23 memlekettik jáne 62 jekemenshik, onda stýdentterdiń jalpy kontıngenti 80 205 adamdy quraıdy.
Jyl saıyn memlekettik tapsyrys kólemi ulǵaıady, eger 2021 jyly 11 405 oryn bolsa, aǵymdaǵy jyly - 16 500 oryn, ósim 5 095 oryndy nemese 44,6% qurady.
Osynyń arqasynda tegin tehnıkalyq jáne kásiptik bilimmen qamtý 2021 jylmen salystyrǵanda 3 300 orynǵa nemese 10% - ǵa ósti (2021 jyly - 36 478 adam, 2022 jyly - 39 618 adam).
Qalada 32 jataqhana jumys isteıdi, onda 3556 stýdent turady, onyń ishine 2500 tósek-orynǵa arnalǵan 12 memlekettik kolej janyndaǵy 13 jataqhana, jáne JOO janyndaǵy jeke kolejderdegi 1256 tósek-orny bar 19 jataqhana kiredi.
Qazirgi ýaqytta qaladan tys turatyn stýdentterge arnalǵan stýdenttik jataqhanalarda oryn tapshylyǵy 2500-den astam tósek-oryndy quraıdy.
Bul máseleni sheshý boıynsha birqatar sharalar qabyldandy:
- bıyl naýryz aıynda Almaty qurylys-tehnıkalyq kolejiniń irgeles aýmaǵynda 60 oryndyq jataqhanasy ashyldy;
- bıyl 12 shilde ákimdiktiń qaýlysymen Almaty sán jáne dızaın kolejine 300 oryndyq jataqhanaǵa ǵımarat berildi;
- 2022 jyldyń sońynda 150 oryndyq servıstik qyzmet kórsetý kolejine arnalǵan jataqhanaǵa arnalǵan 4 qabatty ǵımarat satyp alyndy. Búgingi tańda jataqhanada aǵymdaǵy jóndeý júrgizý úshin jergilikti búdjetten 70 mln. teńge bólindi.
Osy jyldyń 1 qyrkúıegine 510 tósek-orynǵa arnalǵan 3 jataqhana ashý josparlanýda.
“Bizdiń basty mindetimiz – kadrlardy daıarlaý sapasyn arttyrý, sondyqtan biz tálimgerlik ınstıtýtyn engizý, quzyrettilik ortalyqtaryn qurý, óndiristik oqytý sheberleri men arnaıy pánder oqytýshylarynyń sapasyn shetelde taǵylymdamadan ótkizý arqyly arttyrý boıynsha keń aýqymdy jumysty bastadyq”,- dep qorytyndylady L.Jylqybaeva.