VietJet Air loýkosteri de Qazaqstanǵa áýe reısterin ashýdy josparlap otyr.
Vetnamda resmı saparmen júrgen memleket basshysy Qasym-Jomart Toqaev SOVICO Group basqarma tóraǵasy Ngýen Than Hýngty qabyldady, dep habarlaıdy Almaty-akshamy.kz Aqordaǵa silteme jasap.
Kezdesý barysynda energetıka jáne logıstıka salalaryndaǵy yntymaqtastyqtyń perspektıvti baǵyttary talqylandy.
Toqaev kompanıa ekonomıkanyń túrli sektorynda zor tájirıbege ıe ekenin atap ótip, elimiz iri ınvestısıalyq jobalardy birlese júzege asyrýǵa múddeli ekenine nazar aýdardy.
Óz kezeginde Ngýen Than Hýng kompanıanyń Qazaqstan aýmaǵynda saýda-logıstıkalyq ortalyǵyn ashýǵa nıeti baryn aıtty. Budan bólek, SOVICO kompanıalar tobyna kiretin VietJet Air loýkosteri Qazaqstanmen aradaǵy áýe qatynastarynyń sanyn arttyrýdy josparlap otyr.
Prezıdent vetnamdyq kompanıanyń aldaǵy josparlaryn quptap, ınvestısıalyq jobalardy júzege asyrý úshin elimizdiń úkimeti tarapynan jan-jaqty koldaý kórsetiletinine senim bildirdi.
SOVICO Group – Vetnamdaǵy eń iri ártaraptandyrylǵan konglomerattardyń biri. Kompanıa energetıka, qurylys, bank jáne qarjy, avıasıa salalarynda túrli jobalardy júzege asyrady. 2022 jyly kompanıanyń tabysy 20,6 mıllıard dollardy qurady.