Almaty óńirlik komýnıkasıalar qyzmetiniń alańynda Halyqaralyq balalardy qorǵaý kúnine oraı uıymdastyrylǵan «Bala qaýipsizdigi – basty nazarda» is-sharalar keshenine arnalǵan baspasóz konferensıasy ótti.
Shara týraly Almaty qalasy Tótenshe jaǵdaılar departamentiniń Memlekettik órt baqylaý basqarmasy bastyǵynyń orynbasary Erkebulan Jumataev baıandady, dep habarlaıdy aqshamnews.kz.
İs-sharanyń aıasynda qoǵamdyq oryndarda, BAQ pen áleýmettik jelilerge jarıalanǵan 724 aqparattyq materıal jaryq kórdi. Ata-analary men balalardy qosyp eseptegende, ol materıal 14 987 adamdy qamtyǵan.
TJ jónindegi departamenttiń aqparatyna qaraǵanda, memleket basshysynyń IV ulttyq quryltaıda «Qazaqstan balalary» atty baǵdarlama ázirleýdi tapsyrǵanyna baılanysty, balalarǵa qaýipsizdiktiń alǵysharttaryn úıretip, órt sóndirýshi men qutqarýshy mamandyǵyna qurmetpen qaraýdy oqytatyn aýqymdy is-sharalar bolyp ótken.
29 mamyr kúni Medeý aýdany ákimdigi, Respýblıkalyq jedel-qutqarý jasaǵy jáne QR TJM Tótenshe medısına ortalyǵynyń qoldaýymen 28 gvardıashy-panfılovshylar saıabaǵynda ótken aýqymdy is-sharaǵa 500 bala qatysty. Balalar órt sóndirý men qutqarý tehnıkalaryn kórip, kınologıalyq qyzmettiń jumysymen tanysty. Sonymen qatar, alǵashqy medısınalyq kómek kórsetý jáne tótenshe jaǵdaılar kezindegi minez-qulyq erejeleri boıynsha sheberlik saǵattary ótti.
İs-shara aıasynda «Qutqarýshylar men órt sóndirýshiler balardyń kózimen» atty sýret baıqaýy uıymdastyrylyp, jeńimpazdar marapattalyp, syılyqtar tabystaldy. Bul baıqaýǵa balalar erekshe yqylaspen qatysty.
Merekelik kóńil kúıdi anımatorlar men qalanyń sımvoly barys qoldady. Sonymen birge, QR TJ mınıstriniń beınequttyqtaýy men qaýipsizdik taqyrybyndaǵy beınerolıkter kórsetildi.
Áleýmettik osal sanattaǵy balalar da nazardan tys qalmady. 26 mamyrda TJD qyzmetkerleri SOS Children’s Village Almaty balalar aýylynda «Qaýipsizdik shekarasyz» atty kóshpeli is-shara ótkizdi.
«İs-shara barysynda balalarǵa órt kezindegi evakýasıa tártibi túsindirilip, órt sóndirý tehnıkalary men jabdyqtary kórsetildi. Sonymen qatar, arnaýly kıimdi kıýden jarys uıymdastyrylyp, alǵashqy kómek kórsetý men sýdaǵy qaýipsizdik erejeleri boıynsha sabaq ótti», – dedi, Erkebulan Jumataev.
Mereke qýyrshaq teatrynyń qoıylymymen, marapattar men syılyqtar tabystaýmen aıaqtaldy.
Sonymen qatar, Pedıatrıa jáne balalar hırýrgıasy ǵylymı ortalyǵynda emdelip jatqan búldirshinderge arnap ta merekelik baǵdarlamalar uıymdastyryldy. Al Bostandyq aýdanynyń TJ basqarmasy Respýblıkalyq sport koleji bazasynda balalarǵa qalaı júzý kerektigin úıretetin dáris ótkizdi.
Departamenttegiler mundaı is-sharalar balalardyń kózin ashyp, olar oqys oqıǵa kezinde qaýipsizdik máselesine jaýaptyraq qaraýdy úırenetinin aıtty.