Qasym-Jomart Toqaev:
– Sizdiń bul saparyńyz – ekijaqty yntymaqtastyǵymyzdaǵy aıtýly oqıǵa. Biz ózara baılanysqa, dostyq pen senimge qurylǵan qarym-qatynasqa aıryqsha mán beremiz. Italıa Qazaqstannyń álemdegi saýda seriktesteriniń úshtigine kiredi jáne Eýropadaǵy iri áriptesimiz. Bul beker emes. Ekijaqty yntymaqtastyqtyń joǵary qarqynyn saqtaýymyz qajet. Sizdiń saparyńyz qos el arasyndaǵy kópqyrly yqpaldastyqty damytýǵa tyń serpin beretini sózsiz, – dedi Qazaqstan Prezıdenti.
Djordja Melonı:
– Elińizge shaqyryp, qonaqjaılyq tanytqanyńyz jáne Astana halyqaralyq forýmynda sóz sóıleýge múmkindik jasaǵanyńyz úshin taǵy da alǵys aıtamyn. Bul forým dıalog úshin mańyzdy alańdardyń birine aınalyp keledi. Biz Qazaqstandy Italıanyń strategıalyq seriktesi, al Ortalyq Azıa óńirin strategıalyq turǵydan mańyzdy toǵyz joldyń toraby retinde qarastyramyz. Bizge dıalog qajet. Muny Ózińiz de jaqsy túsinesiz. Qazaqstan – Italıanyń kóptegen sala boıynsha mańyzdy áriptesi. Eki el arasyndaǵy yntymaqtastyq tabysty damyp keledi. Áıtse de, keshe aıtqanymdaı, energetıkadan bastap mádenıetke deıin, ýnıversıtetterdiń tájirıbe almasýy, halyqtar arasyn jaqyndatý baǵyttarynda budan da joǵary nátıjege qol jetkizýge múmkindik bar, – dedi Italıa Premer-mınıstri.
Kezdesýde saýda-ekonomıkalyq jáne ınvestısıalyq yqpaldastyqty keńeıtý perspektıvasy talqylandy.