Kúsh qoldanyp, 1 mln teńgesin tartyp alǵan
Almatyda jergilikti turǵyndy urlap, jaldamaly páterge aparyp, uryp-soǵyp, aqsha talap etkender ustaldy, dep habarlaıdy Almaty-akshamy.kz Almaty oblystyq polısıa departamentiniń baspasóz qyzmetine silteme jasap.
Bostandyq aýdandyq polısıa basqarmasynyń málimetinshe, aldyn ala tergeý derekterine sáıkes, 40 jastaǵy almatylyqty úsh adam urlap áketip, jaldamaly páterde ustap, kúsh qoldanǵan jáne 1 mln teńgesin tartyp alǵan.
Kúdiktiler aldymen jábirlenýshiniń uıaly telefony men altyn shynjyryn tartyp alǵan.
«Qajetti kólemde aqshasy bolmaǵan soń, kúdiktiler jábirlenýshi G.-dan aqshany tanystarynan alyp berýdi talap etken. Jábirlenýshi jolda patrúldik kólikti kórip, kómek surap aıqaılaı bastaǵan, sol ýaqytta kúdiktiler qasha jónelgen. Alaıda olar kóp uzamaı qolǵa tústi. Bul - 1995 jyly týǵan F. esimdi Almaty oblysynyń turǵyny bolyp shyqty. Al onyń sybaılastary 1994 jylǵy S. men 1996 jyly týǵan J. Shyǵys Qazaqstannan. Kúdiktiler QR QPK-niń 128-babyna sáıkes ýaqytsha ustaý ızolátoryna qamaldy», - dedi, Bostandyq aýdandyq polısıa basqarmasynyń bastyǵy, polısıa polkovnıgi Maqsat Qanapáev.
Atalǵan derek QR QK-niń 194-baby 3-bóligi (bopsalaý) jáne QR QK-niń 125-baby 2-bóligi (adam urlaý) boıynsha sotqa deıingi tergeýdiń biryńǵaı tizilimine tirkeldi.
Sondaı-aq, polısıa qyzmetkerleri QR QPK-niń 201 baby jáne QR Konstıtýsıasynyń normalaryna sáıkes, qylmystyń basqa da mán-jaılary jarıa etýge jatpaıtynyn málim etti.