Almaty qalasynyń turǵyny Baǵlan Baýyrjanuly oılap tapqan mobıldi qosymshanyń kópke kómegi tıgen.
Ónertapqyshtyń startap jobasy avtosheberler men kólik júrgizýshilerin bir qosymshada baılanystyrady. Beep dep atalatyn joba - kóligi syr bergender úshin taptyrmas kómekshi. Jas kásipker elimizde joǵary baǵalanǵan júıeni AQSH naryǵyna shyǵarýdy da josparlap otyr, dep habarlaıdy Almaty-akshamy.kz.
Ónertapqysh Baǵlan Baýyrjanulyna jolda buzylyp qalǵan kólikterge jyldam kómek kórsetý ıdeıasy oılamaǵan jerden keledi. Bir kúni basqa qaladan kele jatyp, temir tulparynyń akýmýlátory otyryp, qolaısyz jaǵdaıǵa tap bolady. Mashınasyn tez jóndep bere qoıatyn sheber izdep ábden qınalady. Sodan soń osy jobany ózi qolǵa alady. «Jas kásipker» kýrsyna qatysyp, bıznes josparyn qorǵap, 505 myń teńge memlekettik grant ıegeri atanady. Oǵan eki noýtbýk alyp, qosymshanyń baǵdarlamasyn jaza bastaıdy. Budan bólek 100 myń dollar ınvestısıa tartady. Bul 2019 jyl edi. Naryqtaǵy qajettilikti dóp basqan startap joba búginde tabysty kásip kózine aınalǵan. Qazaqstan men Reseıdiń 15 qalasynda paıdalanylatyn mobıldi qosymsha endi AQSH turǵyndary úshin de qoljetimdi bolady.
«Qazaqstanǵa úlken tabys alyp keledi, ekonomıkasyna da, óıtkeni 280 mln avtokólik, onyń 50 mln avtokóligi az degende eki jyl saıyn qyzmet kórsetýdi qajet etedi. Ol 100 mlrd dollar jylyna. Ol jaqta jóndeý 100 dollardan joǵary», - deıdi Beep jobasynyń quryltaıshysy Baǵlan Baýyrjanuly.
Baǵlannyń ónertabysy búginde birqatar avtosheberlerdiń qosymsha tabys kózine aınalǵan. Olar osyndaǵy tapsyrystardy oryndap, tabysyn arttyryp júr. Naqtyraq aıtsaq, bul baǵdarlama arqyly janarmaı jetkizý, dóńgelek úrleý, kólik otaldyrý, evakýator shaqyrý syndy tapsyrystan bastap, kúrdeli jóndeý jumystaryna deıin qamtylǵan.
«Mashınam ashylmaı, sıgnalızasıasy jóndi istemeı, problemasyn jazyp, túsirip, ótinim tastaǵam. Óz baǵasyn qoıyp, 5 mınýt ishinde habarlasty elektrıkter. Mekenjaıymdy aıttym, jarty saǵattyń ishinde kelip jasap berdi», - deıdi kólik júrgizýshi Bekzat Ismaıl.
Ónertapqysh endi bul qosymshanyń qyzmetter tizimi men múkindigin keńeıtýdi oılastyryp otyr. Sonyń biri – avtomobılderdiń tehnıkalyq jaǵdaıyn aldyn ala baǵalaıtyn, kólik ıesine der kezinde eskertý jasaıtyn jasandy ıntellekt júıesin iske qospaq.