«Optovkany» 2013 jyldyń jeltoqsanynda «Naıza-BN» kompanıasy memleketten satyp alǵan.
Sot almatylyq ataqty bazardy memleketke qaıtardy, dep habarlaıdy Almaty-akshamy.kz
Tengrinews.kz taratqan aqparatqa sáıkes, Almatynyń Ekonomıkalyq soty buǵan deıin jekeshelendirilgen Barys IV bazaryn memleket menshigine qaıtarýdy talap etken qalalyq prokýratýranyń shaǵymyn qanaǵattandyrdy.
İs materıaldarynan 2013 jyldyń jeltoqsanynda «Naıza-BN» kompanıasy Barys IV bazaryn memleketten satyp alyp, Almaty qalasy Memlekettik múlik jáne jekeshelendirý departamentimen kelisim shart jasalǵany belgili boldy. Buǵan deıin Bas prokýratýra bul nysannyń bes ese arzan baǵaǵa satylǵanyn habarlaǵan bolatyn. Naryqtyq quny 1,5 mıllıard teńge bolsa, 307 mıllıon teńgege satylǵan. Osyǵan baılanysty Almaty prokýratýrasy joǵaryda atalǵan kelisimshartty jaramsyz dep taný týraly talap-aryzben sotqa júgingen.
«Memlekettik organ zańdy tulǵanyń jarǵylyq kapıtalyndaǵy memlekettiń úlesin jekeshelendirý kezinde zańsyz jeńildikter men artyqshylyqtar berýi prokýrordyń talap qoıýyna negiz bolyp otyr. Sot talqylaýy barysynda talap aryzda keltirilgen dálelder rastaldy. Mámileni jaramsyz dep taný úshin satyp alýshyǵa obektiniń qunyn tómen baǵalaýda kórsetilgen zańsyz jeńildikter men artyqshylyqtar berý negiz boldy. Sotta memlekettik múlikti arzandatylǵan baǵamen satý deregi rastaldy», - dedi qalalyq sottyń baspasóz qyzmeti.
Sot talap-aryzdy qanaǵattandyryp, satyp alý-satý shartyn jaramsyz dep taný týraly sheshim qabyldaǵany atap ótilgen.
«Almaty prokýratýrasynyń talap-aryzy qanaǵattandyrylyp, satyp alý-satý sharty jaramsyz dep tanylsyn. Sot sheshimine sońǵy sheshim shyǵarylǵan kúnnen bastap bir aı ishinde apelásıalyq jáne prokýrorlyq ótinishhat berýge bolady», - dedi sýdıa Janar Esembaeva.
Sottyń sheshimi zańdy kúshine engen joq.