Jazǵy demalys qyza tústi. Aýa raıynyń ashyq turýy balalardyń kóp ýaqytyn úıden góri syrtta: jaǵajaıda, sporttyq alańdarda ótkizýlerine jáne qala kóshelerinde jaı serýendeýleri úshin jaqsy múmkindik. Tájirıbe kórsetip otyrǵandaı, osy kezeńde balalardyń jaraqat alý jaǵdaılary jıileıdi. Mektep oqýshylaryna jazda qandaı qaýip bar jáne onyń aldyn qalaı alýǵa bolatynyn ÓKQ alańynda Almaty qalasynyń «Balalar shuǵyl medısınalyq járdem ortalyǵynyń» qabyldaý bóliminiń meńgerýshisi Meıirjan Qurmanalıev aıtyp berdi, dep habarlaıdy Almaty-akshamy.kz.
Balalar jaraqatyna qatysty statısıka jaǵa ustatarlyq – jyl basynan beri Almaty dárigerlerine 42 069 bala júgingen. Ótken jyly bul kórsetkish 80 myńnan asqan bolatyn.
Kóbine tómengi synyp oqýshylary jıi jaraqattanyp qalady. Balalar samokattan, velosıpedten, átkenshekten qulap qalýlary múmkin. Keıde úı jaǵdaıynda turmystyq jaraqat alyp jatady. Mundaı kórsetkish 44%-ǵa teń. Al kóshede balalardyń 35%-y jaraqattanady.
Balalardyń jaraqattanýyna jıi sebep bolatyn jaǵdaılar retinde sarapshy eresekterdiń jaýapsyzdyǵyn jáne balalardyń qaraýsyz qalýyn, balalardyń tártipsizdigin, qaıǵyly jaǵdaılar men basqa da sebepterdi atady.
«Bul jerde de ata-analardyń roli mańyzdy. Olar balalarmen sóılesip, qarapaıym qaýipsizdik erejelerin túsindirýleri kerek. Demalys kezinde bala kúnniń kóp bóligin taza aýada ótkizedi. Sol sebepti oǵan mindetti túrde kóshede qaýipsiz júrý erejelerin úıretken jón. Oıyn kezinde kishkentaı balalardy qaraýsyz qaldyrmaǵan durys. Qalamyzda jyldam qarqynmen damyp jatqan balalar alańdary, demalys aımaqtary kóp. Ókinishke qaraı, kóptegen ata-analar osyǵan mán bermeıdi. Qabyldanǵan qaýipsizdik sharalaryna qaramaı, balalar ata-analarynyń jaýapsyzdyǵynan kóptegen jaraqattarmen túsip jatady», - dep bólisti dáriger.
Meıirjan Qurmanalıev eresekterge jol qozǵalysy erejelerin saqtaý týraly balalarǵa jıi aıtyp, qaýipsizdik tehnıkasy boıynsha nusqaýlyqtar ótkizýdi, dári-dárimekti balalarǵa qoljetimsiz jerge qoıýdy, balalardy eshqashan jaǵada jáne sýda qaraýsyz qaldyrmaýdy, ystyq aýa raıynda balalarǵa bas kıim kıýdi jáne olardy kúnnen qorǵaýǵa keńes beredi. Ata-analar balalaryna tez tutanatyn, tesetin, kesetin, jarylǵysh jáne atys qarýynyń ne ekenin jáne olardyń qandaı qaýip tóndiretinin túsindirýge mindetti.
Balalarǵa qıyn jaǵdaıǵa tap bolǵanda, olar ata-anasyna ǵana emes, jedel qyzmetterge de qońyraý shala alatyndaryn aıtyp, túsindirý kerek. Bul qyzmetterdiń telefon nómirleriniń tizimi úıde eń kórinetin jerde ornalastyrylýy kerek. Bul sandardy bala jatqa bilse, tipti jaqsy.