Air Astana IPO-ǵa shyqqan jaǵdaıda onyń aksıalarynyń jartysynan astamynyń ıesi otandyq rezıdentter bolýy kerek, dep habarlaıdy Almaty-akshamy.kz.
Bul týraly «Samuryq-Qazyna» ulttyq ál-aýqat qorynyń damytý jáne jekeshelendirý jónindegi basqarýshy dırektory Ernar Janádil málim etti, dep jazdy QazAqparat.
«Air Astana kompanıasy IPO-ǵa shyqqan jaǵdaıda onyń ornalastyrylǵan aksıalarynyń 51 paıyzy qazaqstandyq rezıdentterde qalýy tıis. Sondyqtan memlekettik holdıń osy alǵyshartty nazarǵa alady. Iaǵnı, aksıa satyp alýshylary qazaqstandyq rezıdentter (jeke jáne zańdy tulǵalar) bolýy kerek. BAE Systems Air Astana aksıalaryn IPO-ǵa ornalastyrýda qandaı da bir basymdyqqa ıe bolǵysy keledi. Biz olardyń ustanymyn qurmetteımiz jáne birlesip jumys isteýge daıynbyz», - dedi Ernar Janádil Astana Finance Days konferensıasy barysynda BAQ ókilderiniń saýalyna.
Onyń aıtýynsha, otandyq qor bırjasynyń múmkindigi kóp.
«Óz tarapymyzdan IPO-ǵa shyqqanda aksıany halyqaralyq úsh alańǵa ornalastyrýdy talap etemiz. Ol AIX jáne KASE jáne halyqaralyq, bul jaǵdaıda BAE Systems London alańyn kózdep otyrmyz», - deıdi Samuryq Qazyna kompanıasynyń ókili.
Buǵan deıin habarlaǵanymyzdaı, Air Astana kelesi jyly IPO-ǵa shyǵady.
«Air Astana kompanıasy IPO-ǵa ótýge daıyn. Bıyl jergilikti bırjalarǵa IPO-ǵa shyǵýdy usynamyz. Biz bedeldi ınvestor taptyq. IPO-ǵa shyǵý úshin aksıonerleriniń pozısıasyna qulaq asýymyz kerek. Qazir olar Air Astana halyqaralyq bırjada jáne jergilikti bırjalarda lıstıńke shyǵýy kerek deıdi. Iaǵnı, kelissózder áli de júrip jatyr, biz olardyń talaptaryn talqylap jatyrmyz. Aldyn ala boljamǵa sáıkes Air Astana kompanıasy IPO-ǵa 2024 jyly shyǵýdy josparlap otyr», - degen edi Ernar Janádil.