QR Prezıdenti janyndaǵy Ortalyq komýnıkasıalar qyzmetinde ótken baspasóz konferensıasynda Almaty ákimi Baqytjan Saǵyntaev «Jańa Almatyny» damytýdyń 2020-2024 jyldarǵa arnalǵan keshendi jospary aıasynda halyqtyń ómir súrýine qolaıly jaǵdaı jasaý, qoǵamdyq keńistikter men polıortalyqty qalyptastyrý týraly aıtyp berdi, dep habarlaıdy Almaty-akshamy.kz
«Jańa Almatyny» damytýdyń keshendi josparynyń is-sharalaryn iske asyrýdy jyl saıyn qarjylandyrý shamamen 200 mlrd teńgeni quraıdy. Búginde jospar aıasynda qalany damytýdyń polıortalyqty modelin eskere otyryp, qala shetindegi kólik, bıznes jáne áleýmettik ınfraqurylymdy jaqsartý boıynsha 286 joba iske asyrylýda.
Halyqty aýyz sýmen qamtamasyz etý basty mindet bolyp tabylady. Sý qubyry jelileriniń qurylysy jalǵasýda jáne búgingi kúni Almaty turǵyndarynyń 98,5%-y ortalyq sýmen jabdyqtalǵan.
Qalaǵa qosylǵan aýmaqtardaǵy sý tapshylyǵy máselesin sheshý úshin kelesi jyldyń sáýir aıynda Qarǵaly ózenindegi sý jınaý qurylysy aıaqtalady. 2022 jyly Aqsaı ózeni men Ermensaı shaǵyn aýdanynda osyndaı qurylystar bastalady.
2025 jyldyń sońyna qaraı Almaty turǵyndaryn aýyz sýmen qamtamasyz etý 100%-dy quraıdy.Qala ómirinde gaz ınfraqurylymy mańyzdy ról atqarady. Qazirgi kezde Almatyda úılerdiń 99,2%-y gazben jabdyqtalǵan.
Sot arqyly ıesiz ınjenerlik jelilerdi anyqtaý jáne taný jumystary jalǵasýda. Sot sheshimderinen keıin jeliler komýnaldyq menshikke qabyldanyp, keıinnen jańǵyrtylady. Búgingi tańda jalpy uzyndyǵy 168,2 km bolatyn 246 ınjenerlik ınfraqurylym nysany anyqtalyp, ıesiz dep tanyldy.
Budan basqa, aǵymdaǵy jyly ákimdiktiń qaýlylarymen 2019 jylǵa deıin anyqtalǵan obektiler komýnaldyq menshikke qabyldandy. Onyń ishinde 96,6 km sýmen jabdyqtaý jelileri, 42,7 km sý burý jelileri bar.