Búgin 1991 jyly 10 jeltoqsanda Nazarbaev QR Prezıdenti retinde ant bergen kún
Nur Otan partıasynyń baspasóz qyzmeti «Tarıhta osy kúni» aıdarymen áleýmettik jelilerde halyq saılaǵan eldiń Tuńǵysh Prezıdenti Nursultan Nazarbaev ant bergen tarıhı data – 1991 jylǵy 10 jeltoqsan kúnine arnalǵan beınerolık jarıalady, dep habarlaıdy Almaty-akshamy.kz
Osydan týra 30 jyl buryn dál osy kúni Qazaq KSR-niń ataýyn Qazaqstan Respýblıkasy dep ózgertý týraly sheshim qabyldandy.
«Táýelsizdik alǵannan keıin elimizdiń memlekettik shekaralary naqty belgilendi. Qoǵamda beıbitshilik pen kelisimniń biregeı úlgisi – Qazaqstan halqy Assambleıasy quryldy. Qazaqstan qýaty jaǵynan álemdegi tórtinshi ıadrolyq arsenaldan bas tartty», - delingen beınerolıkte. Kedeılik deńgeıi 10 ese, ıaǵnı 46,7-den 4,6%-ke deıin qysqardy. $400 mıllıard tikeleı ınvestısıa tartyldy.
Bul – Ortalyq Azıa elderine keletin barlyq ınvestısıa aǵymynyń 75%-ten astamy. «170 mıllıon sharshy metr turǵyn úı paıdalanýǵa berildi. 30 myń shaqyrym jol salynyp, qaıta jańartyldy. 1400 jańa densaýlyq saqtaý nysany, 1800-den astam jańa mektep pen 900 balabaqsha ashyldy», - dep atap ótti partıanyń baspasóz qyzmeti Qazaqstan halqyn kele jatqan Táýelsizdik kúnimen quttyqtaı otyryp.
Eske sala keteıik, Nur Otan partıasy Saıası keńesiniń keńeıtilgen otyrysynda Qazaqstannyń Tuńǵysh Prezıdenti – Elbasy Nursultan Nazarbaev qazaqstandyq jastarǵa negizgi baǵdar bolatyn «Eldiktiń 7 tuǵyry» qaǵıdattarynyń jıyntyǵyn usynǵan bolatyn. Olar - «Táýelsizdik – kez kelgen azamat úshin eń qasterli qundylyq», «Birlik pen kelisim – eldigimizdiń myzǵymas tuǵyry», «Jer – ata-baba murasy, halyq qazynasy», «Otbasy men salt-dástúr – qoǵamnyń altyn dińgegi», «Ulttyq mádenıet – halyqtyń rýhanı tiregi», «Bilim men eńbek – baqýatty ómirdiń kilti» jáne «Pragmatızm – básekege qabiletti bolýdyń kepili» qaǵıdattary.