Uly dala dástúri jastardyń qalalyq mádenıetine qalaı enedi? Almatylyq Maksım Sorokın erekshe joba oılap tapty. Ol belsendi jastardy mádenı qundylyqqa baýlyp, qazaq halqynyń dástúrimen tanystyra otyryp, dástúrli buıymdar beınelengen bordtar jasaıdy.
Bir qýantarlyǵy, kórpesheler men dástúrli kıiz tápishkeleri bar taqtalar jas urpaqtyń kóńilinen shyqty. Ekstremaldy sportshylardyń ózderi ulttyq taqtalardy jyly qabyldaǵan. Olar shet elderde ótetin jarystarda tek sporttyq sheberlikti ǵana emes, sonymen qatar qazaq jeriniń dástúrin, mádenıetin pash etýge bolatynyn tilge tıek etti.
– Dızaınǵa qatysty ıdeıalar óte kóp. Bizdiń birinshi toptamamyz 90-shy jyldardyń stıline sáıkes jasaldy. Biz ol kezde tanymal Sony Walkman oınatqyshyna, aýdıokassetalarǵa jáne oıyn prıstavkalaryna siltemeler jasadyq. Ekinshi toptamada etnıkalyq jáne qalalyq motıvter paıda boldy. Biz buny Almaty men Qazaqstannyń mádenıetine degen súıispenshiligimiz ben qurmetimizdi kórsetýdiń tamasha múmkindigi dep bilemiz, – dedi joba uıymdastyrýshysy Alekseı Efımchenko.
Barlyq taqta kanadalyq úıeńkiden jasalǵan. Ádette taqta tyǵyz basylǵan jáne bir-birine jelimdelgen jeti qabattan turady. Ázirge Qazaqstanda taqtalar óndirisi jolǵa qoıylmaǵan, óıtkeni tıisti zaýyttar joq. Álem elderinde de olar kóp emes. Al Almaty bordtary sıaqty biregeı dızaın álemniń esh jerinde joq kórinedi.