Qazir Almaty men Elordada, oblys ortalyqtarynda fıtnes-klýb, sport zaldary az emes. Biraq myna álemdik pandemıa, daǵdarys, kúndelikti kúıbeń tirlik pen jumysbastylyqty eskerip, jurtshylyqtyń tán saýlyǵyna jappaı den qoıýyna mursha berip jatqan birde-bir sport zaly joq. Olar áldeqashan qaltasy qalyńdarǵa ǵana qyzmet kórsetýdiń jolyna túsip ketti.
Máselen, bir ǵana Almatyda irili-usaqty 70-ke jýyq fıtnes klýbtar, saýyqtyrý ortalyqtary bar. Alaıda, olardyń baǵasy, qyzmet kórsetý quny óte qymbat.
Trenajer zalyna aptasyna úsh ret barsańyz, aıyna 20 myń teńge tóleısiz. Baseınde júzýdiń bir aıǵa arnalǵan arzan abonementiniń ózi 20–25 myń turady. Biraq kez kelgen ata-ana balasyn trenajer zaldarǵa jiberetin bolsa, onyń óz betimen daıyndalǵanyn emes, kásibı ınstrýktormen birge jattyqqanyn qalaıdy. Óıtkeni, onsyz qansha aı shuǵyldansa da, nátıje shyǵarý qıyn. Jattyǵý zaldarynyń ózi de ınstrýktorlarmen derbes aınalysýǵa keńes beredi.
Alaıda, oǵan taǵy da qosymsha aqy qosylady. Ár ınstrýktor óz qyzmeti úshin kem degende 10 myń teńge alady. Eger ol sport sheberi nemese túrli saıystardan chempıon ataǵyn alsa, onyń qyzmet aqysy qymbat bolady. Bul rette kásibı mamannyń jattyǵýyna top bolyp qatyssańyz, sál arzandaý túsedi. Al eger jeke ózin ǵana daıyndaıtyn bolsa, onyń quny joǵary turady. Bul tusta trenajer zaldarynyń bári jeke bolǵandyqtan, balalarǵa eshqandaı jeńildik qarastyrylmaǵan. Kóp balaly otbasy bolsyn, múgedek bala bolsa da – aqy bárine birdeı.