Ál-Farabı atyndaǵy Qazaq ulttyq ýnıversıtetiniń Fılosofıa jáne saıasattaný fakúltetinde Dintaný mamandyǵynyń 1-kýrs stýdentterine arnalǵan «Sen halqyńnyń júregindesiń, jaýynger!» atty tárbıe saǵaty ótti.
İs-shara 15 aqpan – Aýǵan jerinen Keńes áskerleriniń shyǵarylǵan kúnine oraı uıymdastyrylǵan bolatyn. Maqsaty – aýǵan soǵysy ardagerlerine qurmet kórsetý, jat jerde kóz jumǵan jerles azamattardy eske alý jáne jastarǵa patrıottyq tárbıe berý.
İs-sharaǵa jalyndaǵan jastyq shaǵyn oq pen ot arasynda ótkizip, elge aman-saý oralyp, týǵan jerimen qaýyshqan ınternasıonalıs-jaýyngerler, atap aıtqanda «Abyroı» aýǵan soǵysy ardagerleri odaǵynyń tóraǵasy Daýylbek Álı Narımanuly jáne onyń birqatar jaýynger-ardager áriptesteri arnaıy keldi. Dintaný jáne mádenıettaný kafedrasynyń profesory Qarlyǵash Borbasova jıynda óziniń alǵysózin aıtyp, qazirgi tańda stýdentter úshin aýǵan soǵysy ardagerleriniń estelik áńgimelerin tyńdaý ónegeli tárbıe dep atap ótti.
Aýǵan soǵysynyń ardager jaýyngerleri stýdentterge týǵan elin súıý, qurmetteýge baýlıtyn taǵlymdy aqyl-keńesterin aıtty.
«Biz bárimiz óz otanymyzdyń patrıoty bolýymyz kerek. Ókinishke oraı, bizdiń qoǵamda memleket aldyndaǵy áskerı mindetin atqarýdan qashatyn jastar joq emes. Bul durys emes. Ultaraqtaı jerimizdi ata-babalarymyz naızanyń ushymen bizder úshin amanat etip saqtap qaldy. Sondyqtan otan aldyndaǵy boryshty óteýge mindettimiz!», – dedi.