Eriktiler kóshe tazalaýshylarǵa ystyq shaı men tátti toqashtar usyndy.
«Almaty SOS» jastar qaıyrymdylyq uıymy búginde qalany aralap, komýnaldyq qyzmetshilerdi jylytyp, kóńilderin kóterý úshin ystyq shaımen qamtamasyz etýde. Volonter Áıgerim Qýatovanyń aıtýynsha, olar bul aksıa týraly áleýmettik jelide jazba jarıalap, 250-den astam qamqor almatylyq uıymǵa kómektesýge bel býǵan.
– Bizdiń eriktiler týǵan qalamyzdy retke keltirip jatqan azamattarǵa alǵysyn bildirdi. Bul usynysqa kóptegen adamdar qoldaý bildirdi. Kópshiligi azyq-túlikpen kómektesti, basqalary aqsha aýdardy. Barlyǵymyz bas qosyp, Almaly, Medeý aýdandaryndaǵy tazalaýshylardy tamaqtandyrýdy jón kórdik. Basynda 15 erikti boldy, biraq bizben birge júrýdi qalaıtyndar kóp boldy. Tazalyq jumystary qaı jerde júrip jatqanyn bilý úshin qaladaǵy komýnaldyq mekeme basshylaryna telefon soqtyq. Osylaısha, almatylyqtardyń atynan qaıǵyly oqıǵalardan keıin kóshelerdi qoqystan tazartyp jatqan adamdarǵa qoldaý bildirýdemiz», - deıdi Almaty SOS jastar qaıyrymdylyq uıymynyń volontery Áıgerim Qýatova.
Kúni boıy olar 100-ge jýyq adamǵa shaımen qosa qoldan pisirilgen bálishter men samsalardy, tátti toqashtardy usyndy.
– Mundaı aksıaǵa birinshi ret qatysyp otyrmyn. Meni bir dosym shaqyrǵan bolatyn, bul bastamaǵa úles qosamyn dep sheshtim. Tazalyq jumystary júrip jatqan kóshelerdi aralap shyqtyq, basshylardyń ruqsatymen komýnaldyq qyzmetkerlerge az ýaqyt úzilis berip, ystyq sháı men toqashtarmen tamaqtandyramyz, – deıdi joba jetekshisi Valerıı Znamov.
Eriktiler aksıany aldaǵy kúnderi de jalǵastyryp, olarǵa qosylýǵa shaqyrady. Qamqorlyq tanytýǵa nıetti almatylyqtar Instagram arqyly habarlasa alady: @almaty_sos