Qazirgi ýaqytta qala tirshiligin qamtamasyz etetin barlyq salanyń jumysyn qalpyna keltirý belsendi júrip jatyr.
Qala ákimi Baqytjan Saǵyntaevtyń málimdeýinshe, qalany jylý, elektr qýaty, sý jáne gazben qamtamasyz etetin barlyq nysan qalypty jumys istep jatyr, dep habarlaıdy Almaty-akshamy.kz
Otyrysta Úkimettik komısıanyń tóraǵasy, Premer-Mınıstrdiń birinshi orynbasary Roman Sklár, Almaty qalasynyń ákimi Baqytjan Saǵyntaev, Ulttyq qaýipsizdik komıtetiniń tóraǵasy Ermek Saǵymbaev jáne İshki ister, Qorǵanys, Tótenshe jaǵdaılar mınıstrleri baıandama jasady.
Prezıdentke Almaty qalasyna qosymsha kúshter, sonyń ishinde UQSHU bitimgerlik kontıngentiniń kúshterin jumyldyrýǵa qatysty bergen tapsyrmasynyń nátıjesinde qalanyń lańkesterden tolyq tazartylǵany týraly baıandaldy.
Saýda ortalyqtary, qoǵamdyq tamaqtaný oryndary, bazarlar, janarmaı beketteri jáne ónerkásip oryndary jumystaryn jandandyrýda, qoǵamdyq kólik iske qosylǵan.
Qasym-Jomart Toqaevqa zardap shekken ákimshilik ǵımaratynda 14 qalalyq basqarma bolǵany, qazirgi ýaqytta olardyń rezervtik ǵımarattarǵa, sondaı-aq ákimshilikke qarasty uıymdarǵa ornalastyrylǵany jóninde aqparat berildi.
Budan bólek tártipsizdik kezinde keltirilgen shyǵyn kólemin anyqtaý jumystary júrgizilýde. Memleket basshysy elimizdiń iri qalasyna jasalǵan terorıstik shabýyl saldaryn óz kózimen kórý úshin Almatyǵa arnaıy kelgenin aıtty.
Prezıdent Úkimettik komısıaǵa Almaty qalasynyń ákimdigimen birlese otyryp, ınfraqurylym nysandaryn, onyń ishinde memlekettik, quqyq qorǵaý jáne arnaýly qurylymdardyń ǵımarattaryn, beınebaqylaý júıesin qysqa merzim ishinde qalpyna keltirýdi tapsyrdy. Sonymen qatar zardap shekken kásipkerlerge qoldaý kórsetiledi.
«Ózderińizge málim, Almaty – meniń týǵan qalam. Osynda dúnıege keldim, oqydym. Aldymyzda qysqa merzim ishinde qalany qalpyna keltirý mindeti tur. Bul – meniń Prezıdent retindegi jáne elimizdiń azamaty retindegi paryzym. Qalanyń qalpyna keletinine esh kúmán joq. Úkimettiń aldynda qalanyń kelbetin burynǵydan da jaqsartý mindeti tur. Bul - óte úlken jumys», – dedi Qasym-Jomart Toqaev.
Memleket basshysy alda UQSHU birlesken bitimgerlik kontıngentiniń bólimshelerin qaıtarý jumystary júrgiziletinin aıtty.
«Erteń UQSHU birlesken bitimgerlik kontıngentin elden shyǵarý jumystary bastalady. Men tıisti memleketterdiń basshylarymen sóılestim. Osy sátti paıdalanyp, osy birneshe kúnde júrgizgen aýqymdy jumystary úshin kontıngenttiń basshylyǵyna alǵys aıtamyn. UQSHU bitimgerlik kontıngentiniń Qazaqstanǵa, sonyń ishinde Almatyǵa kelgeni jalpy elimizdegi jaǵdaıdy turaqtandyrýda úlken ról atqardy. Bul áreketterdiń lańkester men sodyrlardyń agresıasyn qaıtarýda úlken psıhologıalyq mańyzy bolǵany sózsiz. Mısıa óte sátti ótti. Men áriptesterime - Uıymǵa múshe elderdiń basshylaryna úlken alǵys bildiremin», – dedi Prezıdent.
Jedel shtab otyrysynyń qorytyndysy boıynsha, Úkimettik komısıa men jergilikti ákimdikter birlesip, qysqa merzim ishinde barlyq aımaqtaǵy nysandardy qalpyna keltirýge, úzdiksiz transport jumysyn qamtamasyz etýge, azyq-túlikpen qamtamazy etýge, sondaı-aq shaǵyn jáne orta bıznes nysandarynyń jumysyn jandandyrýǵa kúsh salý tapsyryldy.