8 naýryz qarsańynda Almatyda óńirlik komýnıkasıalar qyzmetiniń baspasóz konferensıasy ótti.
Onda «Smelostbyt pervym» korporatıvtik qorynyń atqarýshy dırektory, «Almaty Marathon» dırektory, marafonshy jáne Ironman Saltanat Qazybaeva áıelder sportynyń damýy, belsendi ómir saltynyń mańyzdylyǵy jáne stereotıpterdi eńserý týraly aıtty, dep habarlaıdy aqshamnews.kz.
Almatyda týyp-ósken Saltanat bala kezinen ákesiniń arqasynda sportpen baılanysty boldy. Alaıda, spıker atap ótkendeı, ol kásibı sportpen aınalyspaǵan.
«Bala kezimde ózimdi ár túrli seksıalarda synap kórdim, biraq esh jerde ýzaqqa qalmadym. Eresek kezimde júgirýge jáne trıatlonǵa qyzyǵýshylyq tanyta bastadym, búgin ózimdi Ironman dep ataı alamyn», - dep bólisti ol.
Ironman - 4 km júzýdi, 180 km velojarysty jáne 42 km marafondy qamtıtyn trıatlondaǵy kúrdeli jarys. Búgingi tańda Saltanat Qazybaeva bul qashyqtyqty 5 ret baǵyndyryp, halyqaralyq jáne jergilikti jarystardyń júldegeri jáne jeńimpazy atandy.
«Almaty Marathon» basshysy retinde Saltanat áıelder sportyn belsendi damytýda. Ol 2012 jyly Almatyda marafondar bastalǵan kezde qatysýshylar arasynda áıelder az bolǵanyn eske saldy.
«14 jyl ishinde bizdiń is-sharalarymyzǵa 39 myńǵa jýyq adam qatysty. Olardyń tek 14 myńy ǵana áıelder. Bul jartysynan az. Biraq jyl saıyn jaǵdaı ózgerýde», - dep atap ótti ol.
Búginde Almatyda áıelder sportpen belsendi aınalysyp qana qoımaı, sporttyq jetistikterdi mansappen, otbasymen jáne jeke tulǵalyq ósýimen biriktire otyryp, eleýli tabystarǵa qol jetkizýde. Alaıda, Qazybaevanyń aıtýynsha, áli kúnge deıin genderlik stereotıpter bar.
«Tipti kásibı sportta erlerge kóbirek kóńil bólinedi. Fýtbolda, jeńil atletıkada, tenıste erler arasyndaǵy jarystar kóbirek qarjylandyrylady jáne kórermender qyzyǵýshylyǵyna ıe bolady. Biraq arýlar da úlken sporttyq nátıjelerge qol jetkize alady jáne ony kórsetý kerek!» - dedi ol.
Sporttaǵy arýlardy qoldaý úshin bir jyl buryn áıelder arasynda júgirý, trıatlon jáne salaýatty ómir saltyn belsendi túrde nasıhattaıtyn «Trigada» áıelder sport qoǵamdastyǵy quryldy.
8 naýryz qarsańynda Trigada qatysýshylary 500 qatysýshyny jınap, Tuńǵysh Prezıdent saıabaǵynda áıelder júgirýin uıymdastyrdy.
«Biz mundaı sharalardyń kóbirek bolǵanyn qalaımyz, arýlar sporttyń barshaǵa qoljetimdi ekenin túsinýleri qajet. Áıelder sportpen shuǵyldanýǵa, jeńiske jetip, myqty bolýǵa quqyly!» - dep atap ótti Qazybaeva.
Almaty sporttyq ınfraqurylymdy damytýdy jáne áıelder arasynda belsendi ómir saltyn nasıhattaýdy jalǵastyrýda. Qalada marafondar, velojarystar, trıatlondar men fıtnes-festıvaldar ótedi, seksıalar men sporttyq qaýymdastyqtar ashylyp jatyr.
«Sport - densaýlyq týraly ǵana emes, senimdilik, tártip jáne jańa kókjıekter týraly. Almaty - bul múmkindikter qalasy, munda árbir arý belsendi ómir men jeńisterge óz jolyn taba alady», - dep qorytyndylady Saltanat Qazybaeva.