Almatylyqtar saıabaqtar men aleıalarda qýrap, sarǵaıyp ketken aǵashtardyń sýretteri men vıdeosyn áleýmettik jelide jarıalap jatyr, dep habarlaıdy Almaty-akshamy.kz QazAqparat-qa silteme jasap.
Ákimdiktiń baspasóz qyzmeti málim etkendeı, qalanyń jasyl qoryn saqtaý jáne abattandyrý maqsatynda 8 aýdan aýmaǵynda mamandandyrylǵan uıymdar jasyl jelekti zıankesterden qorǵaý úshin mehanıkalandyrylǵan jáne qolmen bıologıalyq tazartý jumystaryn júrgizip jatyr. Óńdeý eldi mekender aýmaǵynda qoldanýǵa ruqsat etilgen bıologıalyq jáne keıbir jaǵdaılarda qaýiptiligi tómen klasty (R-4) hımıalyq preparat qoldanylady.
«Mysaly, «Bıtoksıbasıllın», «Aktarofıt» mıkrobıologıalyq preparaty qoldanyldy. Bul preparattyń ereksheligi - onyń quramynda toksınder joq. Bul preparat adamdarǵa, araǵa, janýarlarǵa, qustar men balyqtarǵa qaýipsiz», - dep habarlady ákimdik.
Buǵan deıin Almaty ákimdigi Jazken Jıembaev atyndaǵy Qazaq ósimdik qorǵaý jáne karantın ǵylymı-zertteý ınstıtýtynyń qyzmetkerlerimen birlesip, qalanyń jasyl qoryna monıtorıń júrgizdi. Nátıjıesinde, emen aǵashtarynan diń zıankesteri anyqtaldy. Qalada 2019 jyly ınvazıvti zıankes túrleri retinde tirkelgen bul zıankester Qyrǵyzstan aýmaǵynan ákelingen.
«Mamandandyrylǵan uıymdar jasyl jelekterge, jalpaq japyraqty aǵashtar men emenderge zıankesterden óńdeý jumystaryn júrgizdi. Jaýyn-shashynnyń kóp bolýy der kezinde óńdeý jumystaryn júrgizýge kedergi keltirip jatyr. Desek te, bul baǵyttaǵy jumystar jalǵasýda, ınfeksıa oshaǵy anyqtalǵan aýmaq jasyl ekonomıka basqarmasynyń baqylaýynda», - dep atap ótti qalalyq ákimdik ókilderi.