Memleket tarapynan 5 jarym mıllıard teńge bólinipti
Bıyl Almatyda Artsport platformasy arqyly 56 myń bala shyǵarmashylyq baǵyttaǵy úıirmege jazylǵan, dep habarlaıdy Almaty-akshamy.kz Almaty.tv-ge silteme jasap.
Bul kórsetkish ótken jylmen salystyrǵanda 2 ese kóp. Oǵan memleket tarapynan 5 jarym mıllıard teńge bólinipti.
Ulan Ádilbaev jarty jyl buryn memlekettik baǵdarlamanyń kómegimen óziniń ortalyǵyn ashyp, qazir ıgiligin kórip otyr. Ol balalarǵa akterlik sheberlik, vıdeo-montaj jáne fotoshop jasaýdy tegin úıretedi. Jáne 3 adamdy jumyspen qamtyp otyr.
«Osy mektepte oqyp júrgenime 3 aı boldy. Osy ýaqyt aralyǵynda akterlik sheberlik, vıdeo, foto, SMM kóp nárse úırendim. Artsport baǵdarlamasy maǵan unaıdy», – dedi qatysýshy Ábilqaıyr Udjyqulov.
«Aptasyna 4 ret kelemin. 2 kúndi akterlik sheberlik saǵatyna arnasam, qalǵan kúnderi foto, vıdeo jasap úırenemin. Jaqsy joba», – dedi qatysýshy Batyrlan Manap.
Bul ortalyqqa Artsport platformasy arqyly 100-den astam bala tirkelgen. Iaǵnı 6-dan 17 jasqa deıingi aralyqta bala qalaǵan úıirmege tegin qatysa alady. Eń bastysy nátıje bar deıdi ustazdary. Akterlik sheberlikti úırenip júrgen baldyrǵandar jaqynda ǵana respýblıkalyq konkýrsta bas júlde alypty. Sondyqtan ata-analar qaýymy bul jobanyń aqyly seksıalarǵa qaraǵanda utymdy tustary kóbirek deıdi.
«Balam osy úıirmege keledi. Ásel 11 jasta. Byltyrdan bastap osyndaı úıirmelerdi estip, soǵan kelip jatyrmyz. Ózi telefonmen vıdeo, foto jasaǵandy jaqsy kóredi», – dedi ata-ana Tileýjan Qusaıynova.
Ulan Ádilbaevtyń aıtýynsha, qazir úıirmege onlaın tirkelý ýaqytsha jabyq. Soǵan qaramastan balalardy qabyldap, barynsha úıretip jatyrmyz deıdi.
«Qazir sońǵy 1-2 aıdyń kóleminde bizdiń saıtymyz jabyq. Basqa balalardy qabyldaı almaı jatyrmyz. Tirkeı almaımyz baǵdarlamaǵa. Biraq biz kelgen balalardy saıt ashylyp qalady-aý degen úmitpen ózimiz tirkep, oqytyp jatyrmyz», – dedi uıymdastyrýshy Ulan Ádilbaev.
Aıta keteıik, ótken jyly shyǵarmashylyq baǵyttaǵy úıirmelerge 628 mıllıon teńge bólinip, 30 myńǵa jýyq bala tegin seksıalarǵa jazylǵan edi.