Qasıetti Ramazan aıy bastaldy – bul oraza, qulshylyq jáne rýhanı tazarý ýaqyty.
1 naýryz ben 29 naýryz aralyǵynda álem musylmandary oraza ustap, al 30 naýryz kúni Oraza aıt meıramyn atap ótedi, dep habarlady Almaty qalasynyń bas ımamy Tólebı qajy Ospan óńirlik komýnıkasıalar qyzmetindegi baspasóz konferensıasynda.
«Ramazan – sabyr, ıgi ister jáne rýhanı kemeldený aıy. Oraza – tek tamaq pen sýdan tyıylý ǵana emes, jan dúnıeni tazartyp, nápsini tárbıeleý», – dep eske saldy ımam.
Onyń aıtýynsha, qaladaǵy barlyq meshitterde taraýıh namazdary oqylyp, Quran hatym túsiriledi.
Jamaǵattyń yńǵaılylyǵy úshin Almaty Ortalyq meshitinde «Ramazan shatyryn» ornatý josparlanyp otyr. Onda kún saıyn 450 adamǵa tegin aýyzashar beriledi.
Sonymen qatar, túrli dárister men rýhanı kezdesýler uıymdastyrylady.
Imam kásipkerlerge úndeý jasap, Ramazan qurmetine áleýmettik mańyzy bar taýarlar men azyq-túlik baǵasyn 10%-ǵa tómendetýge shaqyrdy. Sonymen qatar, turǵyndarǵa qasıetti aıda alkogól ónimderin satýdan jáne ishýden bas tartý usynyldy.
Aı boıy qala meshitterinde dinı dárister, túsindirý jumystary jáne merekelik sharalar ótedi. Olardyń ishinde rýhanı dástúrlerdi jandandyrýǵa baǵyttalǵan «Jarapazan-Party» baıqaýy da bar.