Sýdaǵy qaýipsizdik qaǵıdalarynyń negizgi talaptaryn saqtaý qajet.
Qaladaǵy Tótenshe jaǵdaılar departamentiniń mamandary shomylý kezinde qaýipsizdik sharalaryn saqtaý kerektigin aıtty, dep habarlaıdy Almaty-akshamy.kz.
«Jazdyń jyly kúnderiniń bastalýymen ońtústik astanada qalanyń sý aıdyndarynda demalǵysy keletin qala turǵyndarynyń sany aıtarlyqtaı ósýde. Dál osy kezeńde sýda adamdardyń qaza bolýymen baılanysty qaıǵyly jaǵdaılardyń sany kóp tirkeledi. Tájirıbe kórsetkendeı, kóptegen jaǵdaılarda azamattar mas kúıinde shomylýdan, jabdyqtalmaǵan jáne ruqsat etilmegen jerlerde shomylý kezinde, sondaı-aq balalardyń ózenderdiń janynda qaraýsyz, eresekterdiń qaraýynsyz qalýyna baılanysty qaıtys bolady»,- delingen TJD baspasóz qyzmetiniń habarlamasynda.
Sol sebepten mamandar saqtyq sharalardy esten shyǵarmaýǵa shaqyrdy. Demalys oryndarynda sý aıdynynda bolǵan kezde sýdaǵy qaýipsizdik qaǵıdalarynyń negizgi talaptaryn saqtaý qajet. Jol berilmeıdi:
- sýda alkogóldik jáne esirtkilik mas kúıinde shomylýǵa;
- qaıyqtardan, katerlerden, aılaqtardan, sondaı-aq osy maqsattarǵa beıimdelmegen zattardan sýǵa sekirýge;
- tekserilmegen jáne jabdyqtalmaǵan jerlerde súńgý;
- tehnıkalyq jáne eskertý belgilerine, býıkalarǵa kóterilý;
- balalarǵa eresekterdiń qaraýynsyz sýǵa kirýge jáne t. b.
Mamandardyń aıtýynsha, shomylý maýsymy kezinde qaýipsizdikti qamtamasyz etý jáne eskertý maqsatynda Áýezov aýdany TJ Basqarmasynyń «Saıran» kóliniń batys jaǵalaýynda aýdan ákimdigimen birlesip «Jazǵy kezeńde sý aıdyndarynda ózin-ózi ustaý erejeleri» siltemesine QR kody bar aqparattyq stend jáne «Júzýge tyıym salynady» taqtaıshasy ornatyldy.
Jumys shomylý maýsymy boıy jalǵasatyn bolady.