Jumysshy mamandyqtar qalasynda Almaty qurylys kolejiniń stýdentteri Arduino tehnologıasymen ázirlegen ınovasıalyq «Aqyldy úıdiń» maketin usyndy.
Avtomattandyrý júıesinde ýaqytqa qaraı shamnyń janyp-sónýin retteıtin ıntellektýaldy jaryq sensorlary, sondaı-aq damyǵan qaýipsizdik júıesi qarastyrylǵan, dep habarlaıdy aqshamnews.kz.
Munda qozǵalys PIR-dachıkteri, gaz jáne tútin sensorlary bar, olar yqtımal tótenshe jaǵdaılardyń aldyn alady. Al temperatýrany ólsheıtin jáne ylǵaldyq sensorlary jeldetý men jylytý júıesiniń jumysyn avtomatty túrde rettep, jaıly mıkroklımatty qamtamasyz etedi.
«Aqyldy úıdiń» barlyq fýnksıalaryn Bluetooth jáne Wi-Fi arqyly smartfonnan qashyqtan basqarýǵa bolady. Qaýip tóngen jaǵdaıda, máselen, gaz nemese tútin shyqqan kezde júıe dereý habarlama jiberedi, al zýmmerler men LCD-dıspleıler qaýip týraly eskertedi.
«Bizdiń jobamyz zamanaýı tehnologıalardyń baspanany qalaı jaıly ári qaýipsiz etetinin kórsetedi. Mysaly, gazdyń shyǵýyn júıe birden anyqtap, ıesine habarlama jiberedi», — deıdi kolej stýdenti Ǵabbas Baıazıtov.
Júıeniń barlyq elementterin stýdentter ózderi qurastyryp, baǵdarlamalaǵan. «Aqyldy úıdi» basqarýǵa arnalǵan mobıldi qosymsha Play Market pen App Store qosymshalarynda qoljetimdi. Bul joba osyndaı tehnologıalardy turǵyn úılerge qoıýdyń naqty perspektıvalaryn kórsetip, olardyń energıa tıimdiligi men qaýipsizdik deńgeıin arttyrady.