Almaty polısıasy qaraýsyz júrgen balalardyń ata-analary jazalanatynyn eskertedi.
Almaty ıývenaldy polısıasynyń málimetinshe, ótken jyly qalada qaıyrshylyqpen aınalysqan 245 sheteldik kámeletke tolmaǵan anyqtaldy. Sondaı epızodtyń biri keshe boldy. Seıfýllın men Abaı dańǵyldarynyń qıylysynda qaıyr surap júrgen 15 jastaǵy jetkinshek tabyldy, dep habarlaıdy aqshamnews.kz.
– Jas jigittiń Ózbekstan azamaty ekendigi jáne ákesimen birge Almaty oblysy Talǵar aýdanynda jaldamaly páterde turatyndyǵy belgili boldy. Bala qaıyrshylyqpen aınalysady, oqý úderisine aralaspaıdy, al ákesi - jumyssyz. Olardy tekserý úshin ákesi men balasy bizdiń bólimshege jetkizildi. Ata-anaǵa qatysty ata-analyq mindetterin tıisinshe oryndamaǵany úshin QR ÁQBtK-niń 127-babyna sáıkes ákimshilik hattama toltyryldy. Al jasóspirim kámeletke tolmaǵandardy beıimdeý ortalyǵyna ornalastyryldy, - dedi Almaly aýdandyq polısıa basqarmasy bastyǵynyń orynbasary Maqsat Pshan.
Sondaı-aq ishki ister mınıstri jarıalaǵan profılaktıkalyq is-sharalar jyly aıasynda, basqa qaladan kelgen jasóspirimderdi jedel anyqtaý maqsatynda ıývenaldy jáne krımınaldyq polısıa, ýchaskelik polısıa ınspektorlary qyzmetkerlerinen turatyn toptar, jastar men jasóspirimder kóp shoǵyrlanatyn oryndarda, atap aıtqanda, aýlalar, jertóleler, bazarlar, oıyn-saýyq oryndary, vokzaldar, saıabaqtarda kún saıyn reıd júrgizedi.