«Sergek» kamerasy baqylaıdy
«Endi saıabaq pen qoǵamdyq oryndarda túkirip, ádepsizdik tanytqandardyń sýreti áleýmettik jelide jarıalanýy múmkin. Qoǵamǵa zıan keltirgenderdi osylaısha masqaralap, olarmen kúresýimiz kerek» deıdi Densaýlyq saqtaý eks-vıse-mınıstri Qamaljan Nadyrov. Tipti dárigerler bolsa, kóshedegi túkirik kesiri qaýipti aýrýlarǵa ákelýi múmkin ekenin aıtyp dabyl qaǵyp otyr, dep habarlaıdy Almaty-akshamy.kz Almaty.tv-ge silteme jasap.
Jer-jerde orynsyz túkiretinderge qatysty jazanyń kúsheıetini týraly sóz bolǵany sol edi, qoǵamda úlken pikirtalas týdy. Bastapqyda bul usynysty elordalyq máslıhat depýttary kótergen edi. Keıinnen ony qoldaıtyndar kóbeıdi. Almaty qalalyq máslıhat depýtaty Sergeı Ponomarev te áriptesteriniń bul oıy oryndy dep otyr. Aıtýynsha, bul tyıymdy zańnamalyq deńgeıde bekitý kerek.
«Saıranda, Atakent, Panfılov kósheleriniń boıynda túrli ádepsiz qylyqty kórip, uıalasyń. Qala ákimdiginiń aıtýynsha, bıyl Almatyǵa keletin týrıser sany 2 jarym esege ósken. Qazaqstannyń mádenı astanasy álemge nesimen tanylady? Trotýarlardaǵy keýip qalǵan túkirikpen be? Meniń oıymsha, bul ádetten arylý kerekpiz», – dedi qalalyq máslıhat depýtaty Sergeı Ponomarev.
Depýtattardyń usynysy almatylyq turǵyndarǵa da unaǵan sekildi. Olar kóshede ońdy-soldy túkiretinderdi jazalaýdy burynnan qolǵa alý kerek edi deıdi.
«Iá. Túkirmeýge, qoqys tastamaýǵa kelisemin. Shetel damyp ketken ǵoı. Ol jaqta mysaly dalada aıaq-kıimimen kóshede de, úılerinde de aıaq kıimmen júredi. Óıtkeni, taza kósheleri. Bizde qoqys», – dedi qala turǵyny Janar Saparbek.
«Gıgena degen bar. Balalarǵa da jaman. Neshe túrli aýrýdyń bári osy túkirikpen juǵady ǵoı. Sol úshin men oǵan qarsy emespin. Tazalyq ta sálde bolsa túzeledi», – dedi qala turǵyny Aınur Asanova.
Al dárigerler jerge túsken túkirikten keler qaýip kóp dep otyr. Sebebi adamnyń aýyz qýysynda túrli bakterıalar shoǵyrlanady. Kesirinen qorshaǵan ortaǵa túsken silekeı keýip, ondaǵy vırýstar aýaǵa tez taraıdy. Qaýiptiligi sol, týberkýlez sekildi qaterli aýrýdy da osy jerde jatqan túkirik arqyly juqtyrý múmkin eken.
«Olar qalaı taraıdy? Bizder júrgen kezde shań-tozańmen kóteriledi. Basyp, ony kıimimizben, aıaq kıimimizben basyp úıge alyp kelemiz. Keıde «qalaı aýyryp qaldyq» dep oılaımyz. Túkirik, qaqyryq, qorshaǵan ortaǵa taralýynda bizdiń adamzattyń aýrýyna úlken yqpalyn tıgizetinin aıtyp ótýimiz kerek», – dedi I. S. Jekenova atyndaǵy qalalyq juqpaly aýrýlar aýrýhanasy bas dárigeriniń orynbasary Tamara Ýtaǵanova.
Buǵan deıin saıabaqtar men qoǵamdyq oryndarda mynandaı «Qoqys tastaýǵa bolmaıdy», «Shemishke shaǵýǵa tyıym salynǵan» degen belgilerdi baıqap júrmiz. Endi olardyń qataryna dál osyndaı «Túkirýge bolmaıdy» degen belgi de ornatylýy múmkin. Endi saıabaqtarda ońdy-soldy túkirip, ádepsiz qylyq tynytqandar ońaı qutylmaıtynyn aıtady. Olar úshin aıyppuldyń kólemi artady, jaza túri qatańdatylady.
Budan bylaı, qoǵamdyq oryndarda oǵash qylyq tanytqandardy Sergek beınebaqylaý kamerasy anyqtaıdy. Qurylǵy endi tek joldaǵy erejeni ǵana baqylap qoımaı, qala halqynyń júrip-turýyn da tekseretin bolady. Osylaısha, kimde-kimniń tártipsiz qylyǵy baıqaýsyzda kameraǵa túsip qalsa, artynan qomaqty kólemde aıyppul arqalaıdy.