Úsh ese kóp sý qajet
Qazaqstanda sý resýrstarynyń jetispeýshiligi qazirden baıqalýda. Bul týraly Sý resýrstary komıteti sý qoryn paıdalaný jáne qorǵaý salasyndaǵy memlekettik baqylaý basqarmasynyń basshysy Marat Imanálıev aıtty, dep habarlaıdy Almaty-akshamy.kz QazAqparat-qa silteme jasap.
«Qazaqstannyń sý resýrstaryn biregeı jáne basqa eldermen salystyrǵanda kóbirek syn-qaterge ushyraıtyn álsiz júıe dep aıtýǵa bolady. Sý resýrstaryna jahandyq jylyný da yqpal etedi. Muzdyqtardyń erýi sýdyń kóbeıýine ákeledi, biraq munyń ýaqytsha áser ekenin atap ótken jón. 2000 jyldary ortasha kópjyldyq ózen aǵyny 120 tekshe km bolsa, qazir 102 tekshe metrdi kórsetip otyr. Bul ózen aǵyny týraly. 2030 jylǵa qaraı keı boljamdarǵa sáıkes, ózen aǵynynyń 99 tekshe kılometrge deıin qysqarýy múmkin. Qazirdiń ózinde biz sý resýrstarynyń jetispeýshiligin sezinip otyrmyz», - dedi M. Imanálıev Ekologıa mınıstrligi uıymdastyrǵan ZOOM koferensıada.
Onyń aıtýynsha, aýyl sharýashylyǵy damyǵan ońtústik óńirlerde – Túrkistan, Qyzylorda, Jambyl oblystarynda sý resýrstary tapshy. Bul oblystardyń qolda bar sý resýrstary taýsyldy.
«Nátıjesinde sý tartýdyń ózi ekologıaǵa zıan keltirip otyr, ıaǵnı biz sýdy tabıǵattan alamyz. Bizdiń barlyq sý resýrstarymyzdyń 44%-y Qytaıdan, Reseıden, Ózbekstannan, Qyrǵyzstannan keletin transshekaralyq sýlarǵa baılanysty. Ońtústik óńirler aýyl sharýashylyǵy ónimderin óndirýge úlken úles qosýda. Sý resýrstary tapshylyǵynyń artýy kezinde sýdy tıimsiz paıdalaný jaǵdaılary da baıqalady. Bizdiń elimizdiń ekonomıkasyna úsh ese kóp sý qajet. Árbir dana óndirýge orta eseppen 129 tekshe metr sý jumsalady, al AQSH-ta, Reseı Federasıasynda 44 tekshe metr, Aýstralıada 21 tekshe metr. Bul, eń aldymen, sýdyń tıimsiz shyǵyndarymen baılanysty, aýyl sharýashylyǵynda tasymaldaý kezinde sýdyń shamamen 40% jáne odan da kóp mólsherin joǵaltamyz. Ekonomıka salalarynda da sýdy qajet etetin tehnologıalardy paıdalanamyz», - dedi Marat Imanálıev.