Sarapshylar egemendi memlekettiń qalyptasýynyń negizgi kezeńderi týraly oı bólisti
Táýelsizdik kúni qarsańynda Óńirlik komýnıkasıalar qyzmetiniń alańynda qoǵam jáne bilim berý salasy mamandarynyń qatysýymen brıfıń ótip, Egemen Qazaqstannyń qalyptasýynyń negizgi kezeńderi týraly sóz qozǵaldy.
Osydan 32 jyl buryn oryn alǵan tarıhı oqıǵalar Qazaqstannyń saıası jáne ekonomıkalyq táýelsizdik alýyna ákeldi. Bul týraly ál-Farabı atyndaǵy QazUÝ Qazaqstan tarıhy kafedrasynyń aǵa oqytýshysy Sabyrhan Smaǵulov eske aldy.
«1991 jyl – Respýblıkamyzdyń tarıhy men taǵdyryndaǵy mańyzdy da aıtýly jyl. Sol jyly 16 jeltoqsanda Táýelsizdik týraly Konstıtýsıalyq zań qabyldandy. Sodan beri 32 jyl ótti. Bul adamzat tarıhy úshin az merzim bolǵanymen, qazaqstandyqtar úshin egemendi el men ulttyq bolmystyń qalyptasý jyldary jáne táýelsizdik úshin kúres bolǵan kezeńderdi eske túsirý jyldary. Memleket basshysy «Táýelsizdik bárinen qymbat» atty maqalasynda atap ótkendeı, búgingi urpaq ult pen eldi saqtaý jolyndaǵy jańa synaqtarǵa daıyn bolýy kerek. Táýelsizdikti kózimizdiń qarashyǵyndaı saqtaýymyz kerek. Uıymdasyp, bir jaǵadan bas, bir jeńnen qol shyǵaryp, elimizdiń kúsheıýine qyzmet etýimiz kerek», – dedi ol.
Ál-Farabı atyndaǵy ýnıversıtette, onyń ishinde tarıh fakúltetinde memlekettiń qalyptasý kezeńderin zerdeleýde kóptegen jumystar atqarylýda. Ǵalymdar men oqytýshylar osy kezeńge arnalǵan kóptegen maqalalar men materıaldar jarıalaýda. Profesor S.Smaǵulov atap ótkendeı, sonaý 2016 jyly ýnıversıtet baspasynan eki tilde 4 kitaptan turatyn kólemdi oqý quraly jaryq kórdi. Qazirgi ýaqytta bul oqýlyqty aǵylshyn tilinde shyǵarý jumystary júrgizilýde.
Brıfıńke sonymen qatar Halyqaralyq qatynastar boıynsha sarapshy, profesor, PhD doktory, Almaty qalasy Qoǵamdyq Keńesiniń múshesi Qaıyrjan Ábdihalyqov qatysty. Ol, Qazaqstan – óz ekonomıkasyn tabysty damytyp, órkendeý men turaqtylyqqa qaraı reformalar men qaıta qurýlar jolymen alǵa basyp kele jatqan jas, erkin jáne táýelsiz memleket ekenin atap ótti. Al táýelsizdikke alyp kelgen uzaq sapar bizdiń qalamyz Almatydan bastaldy.
«Almaty – Táýelsizdigimizdiń besigi, dál osy jerde eski Úkimet úıinde 1991 jyly 16 jeltoqsanda Qazaqstan Respýblıkasynyń Joǵarǵy Keńesi Táýelsizdik Deklarasıasyn qabyldady. Sol kezden bastap táýelsizdigimizdiń esebi bastaldy, ony alǵashqy saǵattarda-aq kóptegen elder moıyndady, al bir jyldyń ishinde 100-ge jýyq memleket dıplomatıalyq qarym-qatynas ornatý arqyly táýelsiz memleketti moıyndady», - dedi Q. Ábdihalyqov.
Sarapshy Jońǵar shapqynshylyǵynan bastap halqymyzdyń táýelsizdikke degen umtylysy qaı zamanda da sónbegenin atap ótti.
Qaıyrjan Ábdihalyqov Táýelsizdiktiń quqyqtyq aspektilerine de toqtalyp, 1989 jyly qazaq tiliniń aldymen memlekettik til mártebesine ıe bolǵanyn, odan keıin 1995 jyly 25 qazanda egemendik alǵan kezeń, Qazaqstan Respýblıkasynyń Tuńǵysh Prezıdentiniń saılaýy jáne basqa da mańyzdy oqıǵalardy eske saldy.
Profesor elimizdiń basty ulttyq merekesin barlyq deńgeıde atap ótýdi, sonymen qatar oqýlyq oqýdan bastaýdy usyndy.
Brıfıń sońynda spıkerler almatylyqtardy quttyqtap, elimizge bereke men birlik tilep, barshany Táýelsiz Qazaqstannyń nyǵaıyp, jarqyn bolashaǵyn qurý jolynda birlikke shaqyrdy.