Depýtat dabyl qaqty.
Senator Bıbigúl Jeksenbaı qyzylshaǵa qarsy ekpe máselesine toqtalyp, dinı senimin syltaýratqan bas tartýshylarmen jumys istelmeıtinin aıtty, dep habarlaıdy Almaty-akshamy.kz
Qazaqstan qyzylsha aýrýy boıynsha Efıopıa, Pákistan, Kongo elderin basyp ozyp, Iemen jáne Úndistanmen teńesti. Bıbigúl Jeksenbaı Qazaqstanda vaksınasıa máselesi birden týyndaǵan joq dep esepteıdi. Mamandardyń aıtýynsha, munyń basty sebepteriniń biri – ata-analardyń barlyǵy birdeı ekpeniń mańyzyn túsine bermeýinde.
"Shalǵaıdaǵy jáne aýyldy eldi mekenderde medısına kadrlary men qural-jabdyqtardyń jetispeýi de balalardy ýaqytyly egýdi qıyndatady. Sonymen qatar biraz óńirde vaksınaǵa qoljetimdilik pen egý qyzmetiniń sapasyna baılanysty máseleler bar. Sonymen qatar dinı nanym-senimderin alǵa tartyp, bas tartatyndarmen de jumys istelmeıdi. Ekpe deńgeıi týraly esepterdiń senimine kúmándanatyndar kóp. Biz Qazaqstannyń sıfrlandyrýda alǵa jyljyǵanyn maqtan etemiz, biraq vaksınasıa derekteri nege áli kúnge deıin qaǵaz dápterge jazylatyny túsiniksiz", dedi Bıbigúl Jeksenbaı.
Sonymen qatar depýtat keıbir áleýmettik-ekonomıkalyq toptardyń vaksınasıamen qamtylý deńgeıiniń tómendigine toqtalyp, vaksınasıa deńgeıi týraly berilgen esepterdiń durystyǵyna kúmán keltirdi. Úkimettiń bul máseleni sheshýge jyldar boıy salǵyrt qaraǵanyna ashýlanǵan senator jaǵdaıdy retteýge baǵyttalǵan birqatar usynysyn aıtty.
"Birinshiden, jaǵdaıdy jaqsartý úshin vaksınasıanyń mańyzy men qaýipsizdigi týraly ata-analar arasynda aqparattyq jumysty kúsheıtý qajet. Ekinshiden, elimizdiń barlyq aımaǵynda sapaly vaksınalar men medısına qyzmetterine kedergisiz qoljetimdilikti qamtamasyz etetin arnaıy mobıldi medısına brıgadalaryn uıymdastyrý qajet. Úshinshiden, sapasy men jaramdy merzimi ótip ketken dárilerdiń, vaksınalardyń joıylýyn qadaǵalaýdy kúsheıtý kerek", dedi Bıbigúl Jeksenbaı.
AQSH-tyń Aýrýlardy baqylaý jáne aldyn alý ortalyqtary (CDC) álemdegi qyzylsha indeti týraly málimetterdi jarıalady. Qazaqstan dertke shaldyqqandar sany boıynsha alǵashqy úshtikke endi.