Qandaı operasıalarǵa suranys joǵary?
Ońtústik astanada jyl saıyn MÁMS esebinen myńdaǵan qymbat operasıalar jasalady. Joǵary tehnologıalardyń kómegimen jasalatyn mundaı otalardyń baǵasy kem degende 1 mln teńge turady, al eń qymbat ota quny 74 mln teńgege jetip jyǵylady, dep habarlaıdy almaty-akshamy.kz.
Ótken jyly almatylyq dárigerler MÁMS qarajaty esebinen 7 myńnan astam joǵary tehnologıaly operasıa jasaǵan. Oǵan Qordan 21,7 mlrd teńge tólengen bolsa, 2024 jyly mundaı otalarǵa 25 mlrd teńge bólindi.
Qordyń Almaty fılıaly mamandary qalada jasalyp jatqan qymbat ári eń kóp suranysqa ıe operasıalar týraly aıtyp berdi. Júrekke qosalqy ımplant júıesin ornatý, quny – 74,8 mln teńge.
Baǵasy qymbat bolyp keletin operasıalar kóshin júrektiń sol jaq qarynshasyn aýystyrý (LVAD) otasy bastap tur. Muny sozylmaly júre tapshylyǵymen aýyratyn naýqastardy emdeýdiń zamanaýı tásili ári júrek almastyrýdyń balamasy deýge bolady.
Sony apparat júrekke qan aıdaýǵa kómektesip, júrek tapshylyǵy belgilerin jeńildetedi. Bul keıbir aýyr naýqastardyń ómirin uzartýdyń birden-bir joly, deıdi mamandar. Buryn mundaı pasıentter aǵzanyń rezervi bitkenshe ómir súrýge májbúr bolsa, apparattyń kómegimen qalypty ómir súrýge múmkindik alady.
Baǵasy óte qymbat turatyn mundaı otany kez-kelgen eldiń búdjeti kótere bermeıdi. Al Qazaqstanda bul operasıa MÁMS esebinen jasalyp jatyr.
Alogendik gemopoetıkalyq diń jasýshalaryn almastyrý, quny – 16,3 mln teńge.
Diń jasýshalaryn transplantasıalaý ádisi julyny zaqymdanǵan naýqastardy emdeý barysynda qoldanylady.
Sondaı-aq, atalǵan ádis obyrdy emdegen kezde zaqymdanǵan nemese joıylyp ketken qan jasýshalaryn almastyrý úshin de paıdalanylyp júr. MÁMS júıesiniń arqasynda qoljetimdi bolyp otyrǵan jasýsha almastyrý operasıalarynyń tıimdiligi 54-ten 73 prosentke jetip jyǵylýy múmkin, deıdi mamandar.
Baýyr almastyrý, quny – 8,3 mln teńge.
Baýyr almastyrý – táýekeli joǵary, qaýipti otalardyń biri. Sebebi baýyr adamnyń aǵza júıesine jappaı áser etetin mańyzdy organ. Organızmde súzgi rólin atqaratyn baýyr almastyrýda sáıkes keletin donor tabý da úlken máseleniń biri. Almastyrǵannan keıin naýqas kútinip, uzaq ýaqyt ońaltýdan ótýi tıis.
Ókinishke oraı, Qazaqstanda baýyry zaqymdanǵan pasıentter sany az emes. Bul dert ásirese, egde jastaǵy adamdar arasynda jıi kezdesedi. Byltyr Almatyda 27 naýqas MÁMS esebinen baýyr almastyrǵan.
Avtomatty kardıoverter nemese defıbrıllátor ornatý, quny – 8 mln teńge.
Almatylyq klınıkalar aýyr dert saldarynan júregi kenet toqtap qalý qaýpi bar naýqastarǵa defıbrıllátor ornatady. Júrek tapshylyǵyna shaldyqqan naýqastar júregine ornatylǵan apparat monıtor arqyly qashyqtan baqylaý júıesine qosylady.
Zamanaýı tehnologıa pasıenttiń jaǵdaıyn alystan baqylap qana qoımaı, emdeý sqemasyn rettep otyrýǵa múmkindik beredi. Baqylaý naýqastyń telefonyna ornatylatyn arnaıy qosymshanyń kómegimen júrgiziledi. Bul ásirese, shalǵaı aımaqtarda turatyndyqtan respýblıkalyq ortalyqtarǵa jıi kelip ımplantty tekserte almaıtyn naýqastar úshin óte yńǵaıly.
Elektromagnıtti estý apparatyn ornatý, quny – 7,3 mln teńge.
Shaǵyn ǵana elektrondy qurylǵy qulaǵy estimeı qalǵan adamdardyń estý qabiletin qalpyna keltirýge múmkindik beredi.
Implant qulaqtyń zaqymdanǵan ishki bóligin aınalyp ótip, estý júıkesin stımýlásıalaıdy. Ol óz kezeginde mıǵa ımpúls berip, nátıjesinde qulaǵy múlde estimeıtin naýqas estı bastaıdy.
Aorta qaqpaqshasyn almastyrý, quny – 6,5 mln teńge.
Aorta qaqpaqshasynyń tarylýy men jetkiliksiz jumys isteýi jıi kezdesetin dert. Kóp jaǵdaıda jumys istemeıtin qaqpaqsha bıologıalyq nemese mehanıkalyq protezben almastyrylady.
Operasıa aǵzadaǵy qan aınalymyn durystap, ár organdy jasýshalarmen qamtamasyz etedi. Otany tájirıbeli kardıohırýrg jasaǵan jaǵdaıda pasıent 20-30 jyl boıy sol protezben júre beredi.
Bas pen moıyn tamyrlary embolızasıasy (nemese oklúzıa), quny – 5,8 mln teńge.
Endovaskýlárlyq embolızasıa anevrızmge shaldyqqan tamyrlardy emdeýdiń eń jetildirilgen ádisi. Ótken jyly almatylyq neırohırýrgter osyndaı 586 ota jasaǵan.
Embolızasıa rentgen apparat jáne kontrast suıyqtyǵynyń kómegimen jasalady.
Neırohırýrg rentgen arqyly baqylaı otyryp tamyrǵa kateter engizedi, sodan soń arnaıy qurylǵynyń kómegimen qan aınalymyn retke keltiredi.
Ekstrakorporaldy uryqtandyrý (EKU), quny – 1,2 mln teńge.
Jasandy uryqtandyrý qatty qymbat bolmasa da sońǵy kezde saqtandyrylǵan azamattar arasynda úlken suranysqa ıe qyzmet túrleriniń biri. Jyl saıyn elimizde MÁMS esebinen ekstrakorporaldy uryqtandyrýǵa 7000 kvota bólinedi, onyń 3241-i – Almatyǵa tıesili.
Ekstrakorporaldy uryqtandyrý – keıingi kezde urpaq ákeletin jastaǵy áıelder men erler arasynda beleń alyp bara jatqan bedeýlik problemasyna qarsy kúrestiń eń tıimdi tásili deýge bolady.