Memlekettik qyzmetshi – Qazaqstan Respýblıkasynyń memlekettik organdarynda belgilengen memlekettik laýazymdy atqaratyn jáne memlekettiń mindetteri men fýnksıalaryn iske asyrý maqsatynda laýazymdyq ókilettikterdi júzege asyratyn tulǵa retinde anyqtalǵan.
Memlekettik qyzmet atqarýshylarǵa qoǵam men memleket tarapynan erekshe senim bildirý bolǵandyqtan memlekettik qyzmetshilerdiń moraldyq-ádeptilik beınesine joǵary talaptar qoıylady jáne zańdylyqtarǵa sáıkes olardyń sybaılas jemqorlyqqa qarsy minez-qulqyna da 2015 jylǵy 23 qarashadaǵy № 416-V QRZ «Qazaqstan Respýblıkasynyń memlekettik qyzmeti týraly» Zańynyń 52 babyna sáıkes kelesi talaptar bekitilgen:
1. Memlekettik qyzmetshiler sybaılas jemqorlyq kórinisterine qarsy turýǵa, sybaılas jemqorlyq quqyq buzýshylyqtarǵa jol bermeýge tıis.
2. Memlekettik qyzmetshiler basqa memlekettik qyzmetshiler tarapynan jasalatyn sybaılas jemqorlyq quqyq buzýshylyq faktileriniń jolyn kesýge tıis.
3. Eger memlekettik qyzmetshide daıyndalyp jatqan, jasalatyn nemese jasalǵan sybaılas jemqorlyq quqyq buzýshylyq týraly aqparat bolsa, nemese buzýshylyqtar jasaýǵa kóndirý jaǵdaılary týraly quqyq buzýshylyqty bolǵyzbaý jáne toqtatý jónindegi qajetti sharalardy qabyldaýǵa (basshylyqqa, ýákiletti memlekettik organdarǵa) jazbasha aqparat berýge mindetti.
4. Memlekettik qyzmetshiler jeke jáne (nemese) zańdy tulǵalardyń óz quqyqtaryn, bostandyqtary men zańdy múddelerin iske asyrýyn qıyndatatyn áreketterge (áreketsizdikke) jol bermeýge tıis.
5. Memlekettik qyzmetshige sybaılas jemqorlyq jasady dep jarıaly túrde negizsiz aıyp taǵylǵan kezde ol osyndaı aıyptaýdy anyqtaǵan kúnnen bastap bir aı merzimde ony teriske shyǵarý jónindegi sharalardy qabyldaýǵa tıis.
Sybaılas jemqorlyqtyń kesiri tek jeke adamdarǵa ǵana emes, búkil qoǵamnyń, memlekettiń damýyna, ósip-órkendeýine nuqsan keltiretini barshaǵa belgili.
Memlekettik qyzmet atqaratyn árbir tulǵa osy aıqyndalǵan talaptardy óz ókilettigin atqarý barysynda mindetti túrde ustanyp otyrsa, bul da bizdiń elimizdiń sybaılas jemqorlyqqa qarsy kúres ádisteriniń bir ereksheligi retinde sanalatyny sózsiz.