Aýa temperatýrasynyń tómendeýine baılanysty tehnogendik órtterdiń shyǵý yqtımaldyǵy artady.
Qala qutqarýshylary almatylyqtardy órt qaýipsizdigi erejelerin saqtaýǵa shaqyrdy, dep habarlaıdy Almaty-akshamy.kz
«Aýa temperatýrasynyń tómendeýine baılanysty tehnogendik órttiń shyǵý yqtımaldyǵy artady, sondyqtan aqaýy bar elektr qurylǵylaryn qoldanbańyz jáne olardy jelide qosýly kúıinde qaraýsyz qaldyrmańyz. Jylytý qazandyqtary men peshterdi paıdalaný kezinde órt qaýipsizdigi erejelerin saqtańyz. Tútin murjalaryn ýaqtyly tazalap, tekserý qajet», - delingen habarlamada.
Mamandardyń aıtýynsha, jylytý peshterin qaraýsyz nemese jas balalardyń qaraýynda qaldyrý qaýipti. Qyzyp ketpeý úshin peshti kúnine eki-úsh ret, bir jarym saǵattan artyq qyzdyrmaý kerek.
Sonymen qatar, bir jelige birneshe energıany qajet etetin qurylǵylardy qospaý kerek, óıtkeni elektr jelisiniń shamadan tys júktelýi qysqa tuıyqtalýǵa jáne órtke ákelýi múmkin.
Tótenshe jaǵdaıda «101» jáne «112» jedel telefondaryn terińiz.
«Ózińizge jáne jaqyndaryńyzǵa qamqor bolyńyz!», - deıdi qutqarýshylar.