Almaty qalasy ákimdiginiń qoldaýymen Qazaqstan Áıelder kúshteri alánsy men QSDQ (Kimep Association of Sport Development) birlese otyryp, jyl saıynǵy «SOI – «Jastar taza aýa úshin» shoý-baıqaýyn sátti ótkizdi.
SOI (students on Ice, ıaǵnı «muz ústindegi stýdentter») muzdy shoý baıqaýyna qatysýǵa nıet bildirgen 11 jup stýdentti sport sheberi, Qazaqstan chempıony, Azıa jarystarynyń chempıony Regına Glazman bes aı boıy, kúndelikti bir tynbaı daıyndaǵan bolatyn. Eńbek aqtaldy desek bolady. «Almaty arena» jastardyń muz-shoýyn tamashalaýǵa kelgen kórermenge lyq toldy. Demek bılet jaqsy satylǵan. Al túsken qarjyǵa Almatynyń Túrksib aýdanyndaǵy ál-aýqaty tómen 20 otbasyǵa gaz tartylady. Mine, sóıtip qalamyzdyń qaıyrymdy jastary osylaısha úlken iske úles qosyp otyr. Al muz aıdynynda mánerlep syrǵanap shoý jasaǵan jeńimpaz jastardyń qýanyshynda shek joq, árıne.
Iá, búginde ekologıalyq ahýal bizdiń qalada ǵana emes, búkil álem boıynsha mańyzdy taqyrypqa aınalyp otyrǵany ras. Peshke jaǵylǵan kómirdiń ózi aýanyń lastap, adam densaýlyǵyna úlken ekologıalyq qaýip tóndiretini belgili. 2019 jyly Almaty qalasy álemdegi ekologıalyq qaýipti 100 qalanyń qataryna kirip, 95-shi orynda shyqqan bolatyn.
Óskeleń urpaqtyń qala máselesine beı-jaı qaramaı, ony ońymen sheshýge belsene atsalysyp, qala tarıhynda óz qoltańbasyn qaldyrýǵa degen umtylysy óte qýantady.
«Bul jobanyń tarıhy uzaq, pandemıa jaǵdaılaryna baılanysty ony eki jylǵa toqtata turýǵa týra kelgen edi. Al búgingi kúni 10 jyldyq mereıtoılyq shoýmen jalǵasyn tapqanyna qýanyshtymyz. Budan keıin jyl saıyn osy áleýmettik mańyzy bar is-sharaǵa jastardy kóbirek tarta otyryp, ári qaraı jalǵastyrýdy josparlap otyrmyz», – deıdi Almaty qalalyq Áıelder kúshteri alánsy tóraǵasynyń orynbasary Álıa Ahmedjanova.