2021 jyly aýdanda úsh mektep kúrdeli jóndeýden ótedi, bes mekteptiń jańa ǵımaraty, sondaı-aq jańa balabaqsha salynady.
Búgin Óńirlik komýnıkasıalar qyzmetinde ótken baspasóz konferensıasy barysynda Bostandyq aýdanynyń ákimi Altaı Rahymbetov osylaı dedi, dep habarlaıdy Almaty-akshamy.kz
«Orta bilim berý ınfraqurylymy týraly aıtatyn bolsaq, bizdiń aýdanda jobalyq qýaty 26 373 oryndy 34 memlekettik mektep jumys isteıdi, onda naqtyly 36 269 oqýshy oqıdy jáne 8 587 oqýshyny qamtıtyn 21 jeke mektep bar. Oqýshy oryndarynyń tapshylyǵy 4 475 birlikti quraıdy», – dedi Bostandyq aýdanynyń ákimi.
Aýdandaǵy oqýshy oryndarynyń tapshylyǵy máselesi burynnan bar bilim berý nysandaryn keńeıtý arqyly sheshiletin bolady.
«Qazirgi kezde úsh mekteptiń jańa korpýstarynyń qurylysy júrgizilýde: Olarǵa 600 oryndyq №38, 300 oryndyq №191 men 425 oryndyq №199 gımnazıa kiredi. №60 gımnazıaǵa 600 oryndyq japsarjaı qurylysy aıaqtaldy. «Bazıs-A» ınvestor-kásipornynyń esebinen 300 oryndyq №65 jalpy bilim beretin mektepterdiń jáne №146 lıseıdiń jańa korpýstarynyń qurylysy bastaldy», – dedi Altaı Rahymbetov.
Sondaı-aq №81 mektep-gımnazıasynda kúrdeli jóndeý jumystary júrgizildi. №40 jáne №45 mektep ǵımarattary kúrdeli jóndeýden ótýde. Orbıta-3 shaǵynaýdanyndaǵy №145 mektepti qalpyna keltirý, seısmıkalyq nyǵaıtý jáne kúrdeli jóndeý josparlanǵan.
Altaı Rahymbetov Bostandyq aýdanynda mektep jasyna deıingi 10 423 balany qamtıtyn 30 memlekettik, 36 jekemenshik balabaqsha men 36 shaǵyn ortalyq jumys isteıtinin aıtty.
«Memlekettik-jekemenshik seriktestik aıasynda «Balapan» respýblıkalyq baǵdarlamasy boıynsha aýdanda 19 uıym jumys isteıdi, olarǵa 984 bala barady», – dedi aýdan ákimi.
Aýdanda jyl sońyna deıin №21 gımnazıa aýmaǵynda 120 oryndy jańa balabaqsha salynady. №71 balabaqshada kúrdeli jóndeý jumystary aıaqtaldy.
Áleýmettik mańyzy bar nysandardyń qurylysy taqyrybyn jalǵastyra otyryp, aýdan ákimi osy jyldyń sońyna deıin «Jańa Almaty» keshendi josparyn iske asyrý aıasynda JITS ortalyǵynyń bólimshesi bar hospıs ǵımaratynyń (qazirgi ýaqytta JSQ ázirleýge konkýrs jarıalandy, Qulja traktisi aýdanynda jer telimi bólindi) jáne 70 kereýettik «Qalalyq balalar klınıkalyq juqpaly aýrýlar aýrýhanasynyń» jańa korpýsynyń qurylysy josparlanǵanyn habarlady.