Tramvaımen serýen jandanbaq
Endi almatylyqtar men qala qonaqtary ortalyq saıabaqta tramvaımen qydyra alady. Biraq ol relspen emes, dóńgelekpen júredi, dep habarlaıdy Almaty-akshamy.kz.
Qurastyrýshylar kólikti shahardyń burynǵy ataýymen «Alma-Ata» dep ataǵan. Qala turǵyndarynyń aıtýynsha, retro-vagon 1980 jyldary megopolıste júrgen «LM-33» markaly tramvaıǵa uqsaıdy. Tramvaıda 12 oryn bar. Vagon kezinde Lenıngradta shyǵarylǵan «LM-33» nemese halyq arasynda «Amerıkanka» dep atalǵan tramvaıǵa uqsatyp, qoldan qurastyryldy. Ony Edil Kóbebaev bastaǵan 4 jigit jasap shyǵarǵan. Olar retrokólikti qurastyrýǵa 3 aıǵa jýyq ýaqyt jumsaǵan.
Qala qonaqtarynyń ishinde bul kólik túrin múlde kórmegender de bar eken.
Almatyda tramvaı 1937 jyly paıda boldy. 90-shy jyldardan bastap onyń qozǵalysyna shekteý qoıyla bastady. Keıinnen birtindep relsi buzyldy. Al 2015 jyly múldem alynyp tastaldy.
«Biz, almatylyqtar, óz qalamyzdy jaqsy kóremiz. Baıyrǵy turǵyndar qalanyń burynǵy kelbetin saǵynyshpen eske alady. Sondyqtan sol kezde júrgen tramvaıdy jurtshylyqqa usynǵymyz keldi. Balalarmen qosa úlkender de otyryp, burynǵy kezdi eske alyp jatady. Árıne, bul – dekoratıvti kólik. Biraq tramvaıdyń elementterin saqtaýǵa tyrystyq. Aldaǵy ýaqytta saıabaqqa osyǵan uqsas retro kólikter qoısaq degen josparymyz bar», – deıdi mádenıet jáne demalys saıabaǵynyń basqarýshysy Vladımır Kalının.
«Bul tramvaıdyń qural-jabdyqtaryn Máskeýden tapsyrys berip aldyrttyq, Almaty qalasynda tanys jigitter jınady. Ony osy qalada ózimiz boıadyq. Tórt adam jınady», – dedi Edil Kóbebaev.
Ónertapqyshtar tramvaıǵa áli de qosymsha bólshekter qoıyp, túrlendirýge nıetti. Al basshylyq turǵyndar arasynda saýalnama júrgizip, taǵy qandaı retrokólikti kórgisi keletinderin bilmek.