Almatynyń Bostandyq aýdanynda 4 myń oryndyq eki «Jaıly mektep» paıda bolady
Bostandyq aýdanynyń turǵyndarymen kezdesý barysynda Almaty ákimi Erbolat Dosaev áleýmettik ınfraqurylym nysandaryn damytý boıynsha júrgizilip jatqan jumystar týraly aıtyp berdi, dep habarlaıdy aqshamnews.kz
Memleket basshysynyń tapsyrmasy boıynsha bastalǵan «Jaıly mektep» ulttyq jobasyn iske asyrý aıasynda aýdanda 4 myń oryndyq eki jańa mektep salynýda. Qala ákimi atap ótkendeı, Egizbaev kóshesindegi 2500 oryndyq mektepti kelesi oqý jyly bastalǵanǵa deıin paıdalanýǵa berý josparlanýda. Rozybakıev kóshesindegi 1500 oryndyq ekinshi mektep 2024 jyldyń sońyna deıin aıaqtalady.
Esterińizge sala keteıik, Almatyda qalalyq ákimdiktiń jobalyq keńsesiniń qoldaýymen júzege asyrylatyn «Jaıly mektep» jobasy aıasynda 36,8 myń oryndyq 22 mektep jumys isteıtin bolady. Birinshi mektep osy jyldyń 1 qyrkúıeginde Áýezov aýdanynda № 97 eski mektep-gımnazıa ornynda ashyldy.
Bilim berý nysandaryn jańǵyrtý úshin bıyl 5 oqý ornyn seısmıkalyq kúsheıtýmen kúrdeli jóndeý josparlanǵan. Onyń ishinde №70 jalpy bilim beretin mektepte jóndeý jumystary aıaqtaldy, al №138 gımnazıada osy jyldyń qazan aıynda aıaqtalady.
Qyrkúıek aıynda №189 jáne №191 jalpy bilim beretin mektepterde jumys bastaldy, olar 2025 jyldyń tamyzynda aıaqtalady. №73 mektepte 2025 jyldyń sońynda aıaqtalatyn 450 oryndyq qosymsha qurylysymen jóndeý josparlanǵan.
Aýdannyń mektepke deıingi uıymdarynda oryn tapshylyǵyn azaıtý boıynsha da belsendi jumys júrgizilýde. Jyl basynan beri 13 jekemenshik balabaqsha ashyldy, №113 bóbekjaıǵa kúrdeli jóndeý júrgizildi, jalpy jobalyq qýaty 480 oryndyq balabaqshalarǵa arnalǵan ǵımarattar qaıta jańartyldy jáne №81 balabaqsha jóndelýde. Sonymen qatar, 2025 jyldyń sońynda aıaqtalatyn úsh balabaqshany jóndeý josparlanǵan.