Jańa qujatty jyl sońyna deıin aıaqtaý kózdelgen
Almaty qalasy men aglomerasıasyn damytýǵa arnalǵan ortaq jańa bas jospar jasalady. Bul týraly búgin qala ákimi Erbolat Dosaev qala qurylysshylary forýmynda málimdedi, dep habarlaıdy Almaty-akshamy.kz Almaty.tv–ge silteme jasap.
Ol 2040 jylǵa deıingi merzimdi qamtıdy. Jańa qujatty jyl sońyna deıin aıaqtaý kózdelgen. Megapolıs basshysy bilikti sáýletshilermen qalany odan ári damytý jaıyn jáne alda turǵan syn-qaterlerdi talqylady. Qala qurylysynan bólek, Almaty aglomerasıasyna mán berý kerektigi aıtyldy. Ákimniń sózinshe, búginde qala men qala mańyndaǵy aýmaqtardy birdeı damytý mańyzdy. Ásirese kólik ınfraqurylymyn jetildirý kerektigi sóz boldy. Jańa bas josparda aglomerasıanyń ýrbandalý prosesin jedeldetý tetikteri de qarastyrylmaq.
«Birneshe jyl boıy Almaty ákimdigi bas josparǵa túzetýler engizýge jumys jasady. Úlken jumys atqaryldy. Biraq ol bas jospar burynǵy 2002 jylǵy josparlardy baza retinde alǵan. Odan beri jıyrma jyl ótti. Qazir qala da, ekonomıka da, Almaty oblysy da ózgerdi. Sondyqtan men jospardy jaqsartýǵa atsalysqan azamattarǵa alǵys aıtqym keledi», – dedi Almaty qalasynyń ákimi Erbolat Dosaev.
Almatyda qurylysshylar keńesi qaıta qurylady. Ol ákimdikke tıesili bolmaıdy, biraq kásibı mamandardan jasaqtalyp, qurylysqa qatysty keńes beretin alań bolmaq. Qala qurylysshylar odaǵy prezıdentiniń aıtýynsha, bul megapolıstiń máselelerin sheshýge jáne turǵyndarǵa jaıly orta qalyptastyrý úshin qyzmet etedi. Durys qala qurylysy saıasatyn júrgizýge múmkindik bermek.
«Ákimdik janynda buryn qurylysshylardan qurylǵan keńes bolatyn. Onda kásibı sáýletshiler qala qurylysyna qatysty jobalaryn talqylap, elekten ótkizetin. Úsh jyldan keıin keńes qaıta jumysyn bastaıtyn boldy», – dedi «Qazaqstan qala qurylysshylary odaǵy» qoǵamdyq birlestiginiń prezıdenti Lúbov Nysanbaeva.