Júzý úsh ózen, sonyń ishinde Gýdzon arqyly ótedi
Qazaqstandyq áıel Ánel Sytdyqova AQSH-ta 48,5 shaqyrym qashyqtyqty júzip ótti, dep habarlaıdy Almaty-akshamy.kz QazAqparatqa silteme jasap.
BQO dene shynyqtyrý jáne sport basqarmasynyń basshysy Qaımen Esendıarovtyń málim etkenindeı, qazaqtyń temir hanshaıymy atanǵan Ánel Nú-Iork qalasynda Manhetten araly aınalasynda 28,5 mıl (48,5 km) qashyqtyqty 9 saǵat 24 mınýtta toqtamastan júzip ótken.
Júzý úsh ózen, sonyń ishinde Gýdzon arqyly ótedi. Sondaı-aq 20 kópirdiń kópshiligi Manhetten men Bronks aralyǵynda ornalasqan.
Batys Qazaqstan oblysynda týyp-ósken Ánel Sytdyqova budan úsh jyl buryn La-Mansh buǵazyn (38 shaqyrym) toqtamastan 15 saǵat 15 mınýtta júzip ótken edi.
«Qazirgi kezde qyzym balalary Oksfordta oqyp jatqandyqtan, kúıeýbalam Nurlanmen birge sonda turyp jatyr», -dedi Áneldiń ákesi Álibek Sytdyqov.
Eske sala keteıik, budan buryn Á.Sytdyqovanyń AQSH-ta taǵy osyndaı eki uzaq qashyqtyqty júzip ótkisi keletini týraly jazǵan bolatynbyz.
Sondaı-aq La-Manshty júzip ótken qazaqstandyq áıelge qos birdeı marapat tabys etildi.
