Búgingi tańda aýlaý boıynsha jumys beınejazýdyń tehnıkalyq quraldaryn paıdalana otyryp júrgiziledi, BKDQ 109, veterınarıalyq qyzmettiń dıspecherlik qyzmeti jáne Open Almaty qoǵamdyq qabyldaýy arqyly tapsyrys qabyldaý júıesi jumys isteıdi. Halyqpen, zooqorǵaý uıymdarymen adopsıa (kúshikter men mysyqtarǵa basymdyq beriledi) máseleleri boıynsha túsindirý jumysy júrgiziledi. Aýlanǵan janýarlar jónindegi aqparat kún saıyn veterınarıalyq qyzmettiń ınternet-resýrsyna ornalastyrylady, dep habarlaıdy Almaty-akshamy.kz.
2022 jylǵy 2 naýryzdan bastap, Qazaqstan Respýblıkasynyń «Janýarlarǵa jaýapkershilikpen qaraý týraly» zańynyń kúshine enýine baılanysty, aýlanǵan qaraýsyz qalǵan jáne qańǵybas janýarlardy, asa qaýipti ınfeksıalyq aýrýy jáne agresıalyq belgileri bar janýarlardy qospaǵanda, óltirýge tyıym salynady.
Qazirgi ýaqytta ýaqytsha ustaý pýnktine (budan ári – ÝUP) túsken kezde, qaraýsyz qalǵan jáne qańǵybas janýarlar etqorektilerdiń oba jáne mıkrosporıa aýrýlarynyń bary-joǵyna tekserýden ótedi. Oń nátıje bolǵan jaǵdaıda, janýar atalǵan zańǵa sáıkes, dárilik jolmen uıyqtatýǵa jatady.
Sondaı-aq, jýyq arada tıisti kásibı mamandarmen – kınologtarmen janýardyń, jekeleı alǵanda, ıtterdiń agresıasyn anyqtaý rásimin ótkizýdi uıymdastyrý josparlanyp otyr. Kún saıyn (demalys jáne meıram kúnderin aıtpaǵanda), bilim berý mekemeleriniń (balabaqshalar, mektepter jáne t.s.s.) tapsyrystary, sondaı-aq azamattardyń qańǵybas janýardyń agresıasyna nemese qaýyp alý qaýpine degen jedel júginýleri boıynsha aýlaý júrgiziledi.
Qazaqstan Respýblıkasy Ekologıa, geologıa jáne tabıǵı resýrstar mınıstrliginiń aqparaty boıynsha, Qazaqstan Respýblıkasynyń «Janýarlarǵa jaýapkershilikpen qaraý týraly» Zańynan týyndaıtyn sáıkes kishi zańdar, onyń ishinde, qaraýsyz qalǵan jáne qańǵybas janýarlardy aýlaýdyń, ýaqytsha ustaýdyń, jáne óltirýdiń turpatty qaǵıdalary aǵymdaǵy jylǵy 1 sáýirde qabyldanýy tıis bolatyn. Alaıda, kúni búginge deıin atalǵan Qaǵıdalar bekitilmedi. Aldyn ala berilgen aqparat boıynsha ony 2022 jylǵy mamyr aıynda bekitý josparlanyp otyr.
Joǵaryda atalǵan Qaǵıdalardyń jobasyna sáıkes, janýardy ýaqytsha ustaý pýnktinde ustaý 5 kúnmen shekteletin bolady. Budan ári, janýar vaksınasıa, zararsyzdandyrý rásimderinen ótýi jáne aýlanǵan oryndaryna shyǵarylýy tıis.
Atalǵan qujat qabyldanǵannan keıin janýardy úshinshi tulǵaǵa berý (adopsıa) boıynsha jumysty kúsheıtý, halyqtyń arasynda janýarǵa jaýapkershilikpen qaraý máseleleri boıynsha túsindirý jumystaryn júrgizý, jiberilgen qaraýsyz qalǵan jáne qańǵybas janýarlardy qadaǵalaý boıynsha zooeriktilermen belsendi jumys júrgizý josparlanyp otyr.
Qalanyń epızootıalyq jaǵdaıyna áser etetin mańyzdy jaıttar qańǵybas jáne qaraýsyz qalǵan janýarlardyń bolýy, úı janýarlaryna jaýapkershilikpen qaraý mádenıetiniń bolmaýy bolyp tabylady.
Qaraýsyz qalǵan janýarlar – bul qazirgi ýaqytta qalalyqtardy tolǵandyratyn asa ótkir máselelerdiń biri. Buǵan quzyrly organdarǵa jáne zooqorǵaý uıymdaryna azamattardyń qaladaǵy janýarlarmen qatar, olardy aýlaýdyń adamgershilikke jatpaıtyn ádisterine degen shaǵymdary men ótinishteriniń kóptep túsýi dálel.