Almatyda «Agrarlyq nesıe korporasıasy» AQ Basqarma Tóraǵasynyń orynbasary – Basqarma múshesi Aıdyn Dosqaraevtyń qatysýymen brıfıń ótti, dep habarlaıdy Almaty-akshamy.kz.
İs-sharaǵa «Agrarlyq nesıe korporasıasy» AQ Qarjy ınstıtýttary men nesıe seriktesterin qarjylandyrý departamentiniń dırektory Nurlan Dáýitov, Almaty oblysy boıynsha fılıalynyń dırektory Ámirhan Smaıyluly, sondaı-aq korporasıa klıentteri qatysty.
Aıdyn Dosqaraev kezdesýge kelgenderge «Agrarlyq nesıe korporasıasy» AQ-nyń qarjylandyrý sharttary men nesıeleý baǵdarlamalary týraly aıtyp berdi. Qazirgi ýaqytta 4 baǵdarlama – «Keń dala», «Agrobıznes», «İsker» jáne shaǵyn nesıeleý baǵdarlamalary iske asyrylýda.
Atap aıtqanda, «Keń dala» baǵdarlamasy kóktemgi egin egý jáne kúzgi jıyn-terim jumystary kezinde sharýalardy qoldaýǵa baǵyttalǵan jáne ol búdjettik nesıe esebinen júzege asyrylýda. Bankter, nesıe seriktestikteri jáne mıkroqarjy uıymdary arqyly qarjylandyrǵanda nesıe alýshylar úshin jyldyq mólsherleme 5%-dy quraıdy. Búgingi tańda Almaty oblysynyń 17 nesıe seriktestigimen kelisimshart jasalǵan.
«İsker» baǵdarlamasy startap jobalar men kásibin jańadan bastaǵan kásipkerlerdi qoldaýǵa baǵyttalǵan. Bul baǵdarlama boıynsha jyldyq syıaqy mólsherleme 6 paıyzdy quraıdy. Nesıe 7 jylǵa deıingi merzimge beriledi. «Agrobıznes» baǵdarlamasy jan-jaqtyly. Ol mal sharýashylyǵyn, ósimdik sharýashylyǵyn, aýyl sharýashylyǵy ónimderin óńdeýdi damytý jobalaryn da qarjylandyrady. Nesıeler jeke jáne tartylǵan komersıalyq qarajat esebinen beriledi. Sýbsıdıa esebinen paıyzdyq mólsherleme 6%-ǵa deıin tómendetildi. Investısıalyq maqsattaǵy nesıeniń maksımaldy merzimi – 12 jylǵa deıin.
Al shaǵyn nesıeleý baǵdarlamasy 21 jastan 35 jasqa deıingi jas kásipkerlerdi qoldaýǵa baǵyttalǵan. Jyldyq syıaqy stavkasy 2,5 paıyzdy quraıtyn nesıe 5 mln teńgege deıingi somada beriledi. Nesıe sharty boıynsha mal sharýashylyǵy salasyndaǵy jobalar úshin 7 jylǵa deıin, bıznestiń basqa da baǵyttary úshin 5 jylǵa deıingi merzim qarastyrylǵan. Almaty qalasy men Almaty oblysyna 6,5 mlrd. teńgeden astam qarjy bólingen. Baǵdarlama boıynsha 344 ótinim túsken. Búgingi tańda onyń ishindegi jalpy somasy 900 mln. teńge bolatyn 223 ótinim maquldanyp, jas kásipkerlerge 412 mln. teńge qarjy berildi.
Brıfıń barysynda Aıdyn Dosqaraev «QazAgroQarjy» AQ-yn esepke alǵanda Agrarlyq nesıe korporasıasynyń jalpy qarjylandyrý jospary 2023-jyly 500 mlrd teńge bolǵanyn habarlady. Onyń ishinde Almaty oblysyna 13,5 mlrd teńgeden astam qarjy bólingen. Bıyl birinshi jartyjyldyqta onyń 7,5 mlrd teńgeden astam somasy ıgerildi.
Kezdesýde fermerler Agrarlyq nesıe korporasıasynyń baǵdarlamalary men sýbsıdıalaý máselelerine qatysty kókeılerindegi suraqtaryna tolyqqandy jaýap aldy.