«Orhan» JSHS-ne qatysty qylmystyq is qozǵaldy

Avtor Almaty-akshamy.kz.
05:53, 13 shilde 2023

Sýret: ashyq derekkóz

Almaty ákimi Erbolat Dosaev Bostandyq aýdanynyń turǵyndarymen kezdesýinde aýdannyń ózekti máseleleriniń biri – yqshamaýdandy jaryq pen sýmen qamtamasyz etý boıynsha qyzmet kórsetetin «Ermensaı» JSHS «Vodsnab qalalyq sý qubyry kásiporny» qyzmetiniń sapasy tómendigi ekenin aıtty, dep habarlaıdy Almaty-akshamy.kz.

Buryn bul kásiporyn «Orhan» JSHS dep atalǵan.

Ákimniń aıtýynsha, 20 maýsymda Bostandyq aýdandyq polısıa bólimi kásiporynnyń zańsyz áreketi faktisi boıynsha qylmystyq is tirkegen.

«Ol mezgil-mezgil ataýyn ózgertip otyrady, búginde biz olar úshin tynymsyz jarystamyz. Bıylǵy jyldyń naýryz aıynda júrgizilgen tekserýlerdiń nátıjesinde Tabıǵı monopolıalardy retteý komıtetiniń departamenti atalǵan kásiporynnyń qyzmetinde zań buzýshylyqtardy anyqtady. Tıisinshe, 120 mln teńge kóleminde aıyppul salyndy», - dedi Erbolat Dosaev.

Ol ákimdik júrgizgen kelissózderden keıin 26 maýsymnan bastap 4,4 shaqyrymdyq áýe elektr jelisin qala balansyna berý jumystary júrgizilip jatqanyn atap ótti.

Joǵaryda atalǵan aýmaqta sý tapshylyǵy birneshe jyldan beri jalǵasyp keledi. Erbolat Dosaevtyń kelýimen Almaty ákimdigi «Orhan» JSHS-ne qatysty sot isin qaıta bastaý týraly bastama kóterdi. Biraq ınjenerlik komýnıkasıalardy qala balansyna óteýsiz berý isi áli de jalǵasýda.

Qazaqstan Respýblıkasynyń «Tabıǵı monopolıalar týraly» Zańynyń 11-babynyń 6-tarmaǵynda kózdelgen quqyqty paıdalanýǵa sáıkes kásiporyn turaqty túrde óziniń tirkelgen jerin Almatydan Almaty oblysyna jáne Astana qalasyna aýystyrady. Osylaısha, «Orhan» JSHS baqylaý jáne quqyq qorǵaý organdarymen ózara árekettesýden qashady.