Almaty qalasynyń Tótenshe jaǵdaılar departamenti ata-analarǵa balalardyń qaýipsizdigin qamtamasyz etý jáne terezeden qulap ketý sıaqty jazataıym oqıǵalardyń aldyn alý týraly ótinishpen júginedi, dep habarlaıdy aqshamnews.kz.
Óńirlik komýnıkasıalar qyzmetiniń alańynda Almaty qalasy Tótenshe jaǵdaılar departamenti bastyǵynyń orynbasary jáne azamattyq qorǵaý polkovnıgi Chaızada Baǵdat aǵymdaǵy jyldyń basynan bastap Respýblıka boıynsha balalardyń terezeden qulap ketý oqıǵalarynyń 150 – den astamy tirkelgenin, onyń ishinde Almatyda aǵymdaǵy jyldyń 8 aıynda-11 jaǵdaı bolǵanyn habarlady.
Tek 2024 jyldyń tamyz aıynda 112 jelisi boıynsha terezeden qulaýdyń 6 jaǵdaıy tirkeldi. Balalar jaraqattarmen, sonyń ishinde aýyr jaraqattarmen aýrýhanaǵa jatqyzyldy. «Abyroı bolǵanda, balalar jazylyp, úılerine jiberildi», - dep atap ótti Ch. Baǵdat.
Sondaı-aq, spıkerdiń málimetinshe, 5 oqıǵa - ata-analar men qamqorshylardyń balalardy qaraýsyz qaldyrýynan, bireýi - ata-ananyń qyraǵylyq tanytpaýy sebebinen týyndady. Sońǵy jaǵdaıda, balanyń 38 jastaǵy ákesi tańerteń, oqıǵa oryn alǵan kezde, basqa bólmede uıyqtap jatqanyn aıtty.
Bul statısıkalyq aqparattar tek 112 nómirine kelip túsken qońyraýlar negizinde ǵana jınaqtalǵanyn atap ótken jón.
«Sońy qaıǵyly aıaqtalyp jatatyn jazataıym oqıǵalardyń negizgi sebebi - balalardy qaraýsyz qaldyrý jáne kóp qabatty turǵyn úılerdiń terezelerinde qorǵanys quraldarynyń bolmaýy», - dedi ol.
Mundaı jazataıym oqıǵalardyń aldyn alý úshin TJD halyqty BAQ arqyly aqparattandyrý, sondaı-aq jadynamalar tarata otyryp, kóppáterli turǵyn úılerdiń páterlerin aralaý jolymen profılaktıkalyq is-sharalar júrgizýde. Balalar qaýipsizdigine baǵyttalǵan úgittik is-sharalar barysynda qyzmetkerler óz quzyreti sheginde zańnamalyq quqyqtyq aktilerdi túsindire otyryp, «balalardyń terezeden qulaýy» taqyrybyna 20 myń jadynama taratty.
Sonymen qatar, TJD qyzmetkerleri «Ózińnen basta» chellendjin bastap, óz balalarynyń qaýipsizdigin qamtamasyz etý úshin páterlerindegi terezelerge qorǵanys júıelerin qalaı ornatatynyn kórsetti.
Aıta ketý kerek, 2024 jyldyń 29 maýsymy men 19 shildesi aralyǵynda «Qaýipsiz úı» aılyǵy jarıalanǵan bolatyn. «Joba aıasynda TJD jáne órt sóndirý qyzmetiniń qyzmetkerleri Almaty qalasynyń volonterlik uıymdaryn tarta otyryp, kóppáterli úılerde úgit-nasıhat sharalaryn júrgizdi», - dep bólisti polkovnık Shaızada.
Ol mundaı is-sharalardy kóppáterli úılerdiń PIK, MIB-tiń qoldap jatqanyn aıtty, ol úshin balalarǵa arnalǵan múltfılmderdiń keshki kórsetilimderi uıymdastyrylyp, ata-analar men turǵyndarǵa balalarǵa qyraǵylyq tanytý kerektigin eske salyp, habardar etti.
Almaty qalasy TJD bastyǵynyń orynbasary ata-analardy bıik úılerdiń terezelerinen balalardyń qulaýynyń qaıǵyly jaǵdaılaryn boldyrmaý úshin barlyq múmkin sharalardy qabyldaýǵa shaqyrdy. Ol qaýipsizdik boıynsha usynystar men keńesterdi aıtty:
1. Kishkentaı balalardy jalǵyz qaldyrmańyz, óıtkeni qulaý jaǵdaılarynyń kópshiligi ata-analar balalardy qaraýsyz qaldyrǵan kezde bolady.
2. Balanyń terezege shyǵýna jol bermeý úshin jıhazdyń barlyq túrlerin terezelerden alystatyńyz.
3. Eshqashan moskıt torlaryna senbeńiz! Olar qulaýdan qorǵamaıdy! Kerisinshe, moskıt tory qaıǵyly jaǵdaıǵa yqpal etedi, óıtkeni bala ózin qaýipsiz sezinedi jáne terezege de, oǵan da súıenedi. Kóbinese balalar tormen birge qulap ketedi.
4. Balaǵa terezeni birneshe santımetrden artyq ashýǵa múmkindik bermeıtin terezelerge arnaıy bekitkishter ornatyńyz.
5. Eger siz balańyzǵa terezeden birdeńe kórsetseńiz - ony árdaıym myqtap bekitińiz, balanyń kenetten qozǵalýyna daıyn bolyńyz, alaqanyńyzdy qurǵaq ustańyz, balany kıiminen ustamańyz.
6. Eger sizde dál qazir qulyptaý nemese saqtandyrý qurylǵysyn ornatý múmkindigi bolmasa, tereze tutqasyn ońaı burap alyp tastasańyz bolady, ol tutqany qajetinshe qoldanyp, paıdalanǵannan keıin birden alyp tastańyz.