Almaty qalasy Tótenshe jaǵdaılar departamentiniń aqparatyna sáıkes qala jáne taý bókterindegi aýdandarda barlyǵy 44 sý aıdyny bar, olardyń 12-si shomylý maýsymy kezinde halyqqa qaýip tóndiredi. Sý aıdyndaryndaǵy qaýipsizdikke baılanysty málimettermen Óńirlik komýnıkasıalar qyzmetiniń alańynda TJD Azamattyq qorǵanys basqarmasynyń aǵa ofıseri, kapıtan Sultanov Esbol Mırasuly bólisti, dep habarlaıdy almaty-akshamy.kz
Departamentpen turaqty negizde júrgiziletin profılaktıkalyq jumystar nátıjesinde, búgingi tańda qala sý aıdyndarynda adam ólimine jol berilmegen. Jyl basynan beri respýblıka boıynsha 141 adam sýǵa batyp ketti, onyń 39-y balalar.
"Sýdaǵy jazataıym oqıǵalardyń aldyn alý maqsatynda Departament polısıa qyzmetkerlerin, Respýblıkalyq jedel-qutqarý jasaǵy qutqarýshylaryn, sondaı-aq eriktilermen birlesip, reıdtik is-sharalar júrgizýde. Búgingi tańda 390-nan astam reıd júrgizilip, 3800-den astam jadynama taratyldy", - dedi spıker.
Reıdterdi júrgizý barysynda sýǵa túsýge tyıym salynǵan oryndarda jaǵdaıdy baqylaıtyn eskertý mashınalary men ushqysh drondar paıdalanylady.
"Jyl basynan beri jalpy sý paıdalaný erejelerin buzǵany úshin eskertý túrinde 18 buzýshy ákimshilik jaýapkershilikke tartyldy. Alkogóldi ishimdikterdi ishkeni nemese qoǵamdyq oryndarda mas kúıinde paıda bolǵany úshin úsh tártip buzýshy ákimshilik jaýapkershilikke tartyldy. Sý aıdyndarynda qaýipsizdik erejelerin buzǵany úshin jalpy somasy 150 myń teńgege alty adam jaýapkershilikke tartyldy", - dep atap ótti E. Sultanov.
Brıfıńte sóz alǵan azamattyq qorǵanys ofıseri shomylý maýsymynda qala turǵyndaryn sýda qaýipsiz júris-turys erejelerin saqtaýǵa, sondaı-aq sý aıdyndary janynda balalardy nazardan tys qaldyrmaýǵa shaqyrdy.
Jazataıym oqıǵalardy boldyrmaý úshin, TJD kelesi erejelerdi saqtaýǵa shaqyrady:
- balalardy sýdyń janynda qaraýsyz qaldyrmaý;
- tek jabdyqtalǵan jaǵajaılarda jáne resmı ruqsaty men qutqarý qyzmeti bar shomylýǵa arnalǵan basqa jerlerde shomylý;
- júze almaıtyn jaǵdaıda, belden joǵary sýǵa túspeý;
- shomylý kezinde bir-birińizdi nazardan qaldyrmaý;
- qalqymalar, qorshaý belgileri men jaǵadan alys júzbeý;
- qaıyqtardan, kópirlerden jáne aılaqtardan sýǵa sekirmeý;
- túnde sýda shomylmaý.