Almaty qalasy boıynsha qylmystyq-atqarý júıesi departamentiniń №13 mekemesinde qylmystyq-atqarý júıesindegi sybaılas jemqorlyqtyń aldyn alý taqyrybynda semınar ótkizildi, dep habarlaıdy aqshamnews.kz.
Almaty qalasy boıynsha Sybaılas jemqorlyqqa qarsy qyzmet uıymdastyrǵan keńeske №13 mekemesiniń qyzmetkerleri, qadaǵalaý qyzmetiniń ókilderi, sondaı-aq 200-den astam sottalǵandar qatysty. Semınarda baıandama jasaǵan Almaty qalasy boıynsha sybaılas jemqorlyqqa qarsy qyzmettiń aldyn ala baqylaý basqarmasynyń basshysy Qanat Salımbaev qylmystyq-atqarý júıesi mekemeleriniń jumysynda ashyqtyq pen zańdylyqty qamtamasyz etý – memlekettiń sybaılas jemqorlyqqa qarsy saıasatynyń ajyramas bóligi ekenin atap ótti.
- Zań talaptaryn saqtaý jáne sottalǵandardyń quqyqtaryn qorǵaý – tek zańnamalyq mindet qana emes, sonymen qatar quqyqtyq memlekettiń damý deńgeıin kórsetetin mańyzdy ólshem. Qyzmetkerler de, sottalǵandar da kez kelgen sybaılas jemqorlyq táýekelderinen aýlaq bolýy tıis. Ol úshin qoǵamdyq jáne ishki baqylaý tetikterin tıimdi engizý qajet, – dep atap ótti Qanat Salımbaev.
Kezdesý barysynda jazany óteý kezinde zań talaptarynyń saqtalýy, qylmystyq-atqarý júıesi qyzmetkerleriniń jumysynyń ashyqtyǵy, sondaı-aq sottalǵandardy qaıta tárbıeleý jáne qoǵamǵa beıimdeý sharalarynyń tıimdiligi talqylandy. Ásirese, túzeý mekemeleriniń qyzmetkerleri úshin ádep qaǵıdalaryn qatań saqtaý jáne qyzmettik mindetterdi oryndaýda ishki baqylaýdy kúsheıtý qajettigine erekshe nazar aýdaryldy. Sottalǵandar ózderiniń jaza óteýleri belgilengen talaptarǵa sáıkes ekenin jáne mekeme qyzmetkerleriniń is-áreketterine qatysty shaǵymdary joq ekenin aıtty. Sonymen qatar olar jazany jeńildetý máselesindegi sot sheshimderiniń ártúrliligine alańdaýshylyq bildirdi.
Qanat Salımbaev sottalǵandarǵa sybaılas jemqorlyq jaǵdaılarymen betpe-bet kelgen kezde qandaı qadamdar jasaý kerektigin, sybaılas jemqorlyqqa qarsy qyzmetke júginý joldaryn jan-jaqty túsindirdi. Aldyn alý sharalary aıasynda sottalǵandarǵa qylmystyń aldyn alý jáne onyń saldary retinde qylmystyq jaza týraly áleýmettik beınejazbalar daıyndaýǵa qatysý usynyldy. Bul tásil quqyqtyq tártipti nyǵaıtýǵa jáne halyqtyń memlekettik organdarǵa degen senimin arttyrýǵa baǵyttalǵan memlekettik saıasattyń mańyzdy sanalady.