Almaty qalasy boıynsha Qylmystyq-atqarý júıesi departamentiniń jeke quramy Qazaqstan polısıasy kúnin saltanatty túrde atap ótti.
Saltanatty jıyndy QAJD bastyǵy ádilet polkovnıgi Abaı Serikuly Qaıyrbekov ashyp, quttyqtaý sóz sóıledi. «Qazaqstan polısıasynyń mereıli merekesi kúni elimizdiń tynyshtyǵy úshin jigerli eńbek etip júrgen barlyq qyzmetkerlerge tabysty eńbek tileımin. Búgin bizdiń aramyzda Qazaqstandaǵy qylmystyq-atqarý salasyna eleýli eńbek sińirgen ardagerlerimiz otyr. Olardyń eńbek joly búgingi jas urpaqqa ónege bolýda. Sondaı-aq, búgingi mereke qyzmet babynda qaza tapqan áriptesterimizdi eske alý kúni. Otan aldynda qabyldaǵan anttaryna adal bolǵan erlerdiń esimi bizdiń júregimizde máńgi saqtalady.
Qylmystyq-atqarý salasynyń jaýapty jumysyn abyroımen atqaryp júrgen barlyqtaryńyzdyń otbasylaryńyzǵa baqyt pen amandyq tileımin», — dedi A.Qaıyrbekov.
Qazaqstan polısıasynyń tól merekesine arnalǵan jıynda Almaty qalasy boıynsha QAJ departamentiniń 100-den astam qyzmetkeri marapattaldy. Olardyń arasynda İshki ister mınıstriniń buıryǵymen kezekten tys shen alǵan jáne «Qazaqstan polısıasynyń 30 jyldyǵy» medalimen, Departamen basshysynyń Alǵys hatymen marapattaldar bar.
Saltanatty jıynda Qylmystyq-atqarý júıesi qyzmetkerleri arasynda qoıan qoltyq urystan ótken XIV chempıonatynda jetistikke jetken sportshy qyzmetkerlerge Alǵys hattar men baǵaly syılyqtar tabystaldy.
Sondaı-aq QAJD qyzmetkerleri qyzmet babynda qaza tapqan áriptesteri A.Sabyrbekovtyń eskertkishine gúl shoqtaryn qoıyp, ony bir mınýt únsizdikpen eske aldy. Saltanatty jıynǵa arnaıy shaqyrylǵan A.Sabyrbekovtyń jubaıyna gúl shoqtaryn tabystap, alǵys aıtty.