Qylmyskerlerdiń qolynan 2 myńǵa jýyq nysan zardap shekti
16 qańtarda ótken brıfıńte Almaty prokýrory Berik Júıriktaev qaladaǵy qoǵamdyq qaýipsizdikti qalpyna keltirý jumystary qalaı júrip jatqanyn aıtty, dep habarlaıdy Almaty-akshamy.kz.
Onyń aıtýynsha, barlyq qylmystardy tergeý úshin quqyq qorǵaý organdarynyń tájirıbeli qyzmetkerlerinen turatyn vedomstvoaralyq tergeý toby quryldy.
«Biz lańkestik áreketterge jáne basqa da qylmystarǵa qatysy bar adamdardy anyqtaý jáne ustaý boıynsha jumys istep jatyrmyz. Qoǵamdyq qaýipsizdikti qalpyna keltirý boıynsha sharalar qabyldanýda. Qazir quqyq qorǵaý organdary 405 qylmystyq isti tergeýde. Sottyń sanksıasymen 249 adam qamaýǵa alyndy», - dedi B. Júıriktaev.
Ol qala boıynsha qylmyskerlerdiń qolynan 2 myńǵa jýyq nysan zardap shekkenin habarlady. Tergeýshiler basym tártippen zardap shekken bıznes nysandaryn tekseredi. Oqıǵa ornynan kóptegen dáleldemeler, zattaı dáleldemeler jáne qylmys izderi alynady. Bul bandıtterdiń kıimderi, beınejazbalar, qylmys quraldary, onyń ishinde 127 qarý. Alynǵan beınematerıaldar qylmysqa qatysýshylardy anyqtaý jáne keıinnen sáıkestendirý úshin paıdalanylady.
«Jumys Adam quqyqtary jónindegi ýákilmen, quqyq qorǵaý uıymdarynyń ókilderimen, Advokattar alqasymen jáne Kásipkerler palatasymen tyǵyz ózara is-qımylda júrgizilýde. Qamalǵandardy ustaýdy táýelsiz baǵalaý úshin olarǵa tergeý ızolátorlaryna kirý múmkindigi qamtamasyz etildi», - dedi qala prokýrory.
Onyń aıtýynsha, azamattardy jábirlenýshi dep tanýǵa erekshe kóńil bólinedi. Bul ótemaqy alý úshin mańyzdy.
Prokýrorlar Prezıdenttiń tapsyrmalaryn oryndaý úshin aýyr jaza berýge áreket jasamaǵandarǵa jazany jeńildetý sharalaryn qabyldaýda.
«Bul jerde quqyq buzýshynyń isi jeke qaralýda. Máselen, qala prokýratýrasy 71 adamnyń jazasyn jeńildetti, tergeý ızolátorynan 91 adamdy bosattyq. Bul baǵyttaǵy jumystar jalǵasýda. Prokýrorlar qylmystyq prosestiń barlyq kezeńderinde azamattardyń konstıtýsıalyq quqyqtarynyń saqtalýyn qamtamasyz etedi», - dedi B. Júıriktaev.
Ol qalada terorızmge qarsy operasıa jalǵasyp jatqanyn eske salyp, kópshilikten shekteýler men quqyqtyq tártipti saqtaýdy surady.
«Feıkterdiń taralýyna jol bermeýge jáne arandatýshylyqqa boı aldyrmaýǵa shaqyramyn. Biraq quqyq qorǵaý organdary qyzmetkerleriniń quqyqtardy buzýyna nemese qıanatyna tap bolsańyz, prokýratýraǵa habarlasyńyz. Kúndelikti onlaın qabyldaý júrgizemiz, áleýmettik jelilerde barmyz», - dedi Almaty prokýrory.