5 qańtar kúni tańerteń 20 myń adam qala ortalyǵyna qaraı bet aldy
16 qańtarda ótken brıfıńte Qanat Taımerdenov megapolıste bolǵan jaǵdaıdy aıtyp, azamattardy qaýipsizdik sharalaryn saqtaýǵa jáne arandatýshylyqqa boı aldyrmaýǵa shaqyrdy, dep habarlaıdy Almaty-akshamy.kz.
3 qańtarda qalada eldiń batysyndaǵy mıtıńilerdi qoldaý maqsatynda zańsyz sherýler ótti. Qalanyń ár jerinde 200-den 2 myńǵa deıin azamat jınaldy. Olarmen túsindirme aldyn alý jumystary júrgizildi. Sherýshiler tarapynan óreskel zań buzýshylyqtar bolǵan joq.
4 qańtar kúni «Almaty Arena» muz saraıynyń janyna 2 myńǵa jýyq adam jınaldy. Sondaı-aq Shyǵys aınalma jolynyń mańynda zańsyz aksıa uıymdastyryldy. Qalanyń basqa bólikterinde 5 myńǵa deıin adam shyqty. Qatysýshylar sany arta bastady.
Rysqulov, Saın, Shyǵys aınalma joly men Tóle bı kósheleriniń boıynda joldardy jaýyp, kólik qozǵalysyn jabý áreketi jasaldy.
Sherýshilerge lańkester, ekstremıster men qylmyskerler qosylyp, bılikke qarsy kúsh kórsetip, ákimdikti basyp alýǵa shaqyrdy.
Garnızonnyń barlyq jeke quramy jasaqtaldy, qalaǵa qosymsha polısıa bólimsheleri men Ulttyq ulannyń áskerı qyzmetkerleri ornalastyryldy, strategıalyq nysandar men tirshilikti qamtamasyz etý obektilerin kúzetý kúsheıtildi. Túski ýaqytta keminde 10 myń adam basyp alynǵan mýnısıpaldyq kólikterdiń kómegimen qorshaýdy buzyp, qala ákimshiligin basyp alýǵa tyrysty. Eki áreketi sátsiz bolǵan soń, narazylar alańnan shyǵyp ketti. Ketip bara jatyp olar qyzmettik jáne órt sóndirý mashınalaryn órtep, "jedel járdem" kólikterin zaqymdaǵan.
5 qańtar kúni tańerteń 20 myń adam qala ortalyǵyna qaraı bet aldy. Sandyq artyqshylyq pen qarýdy paıdalanyp, birneshe qorǵanys shebin buzyp ótip, Respýblıka alańyna jetip, ákimdik ǵımaratyn basyp aldy.
Qalanyń ártúrli aýdandarynda sodyrlar toptary oq jaýdyryp, qalany qıratyp, qarý-jaraq dúkenderin basyp alyp, beı-bereket oq jaýdyryp, kezdeısoq ótip bara jatqandardy óltirip, saýda ortalyǵynda búlikter jasaı bastady. Sol kúni keshke Almaty ákimi B. Saǵyntaevtyń kortejine oq atyldy. Qazaqstan Respýblıkasynyń Prezıdenti Almatyda tótenshe jaǵdaı engizdi.
Qańtardyń 5-inen 6-syna qaraǵan túni sodyrlar polısıa bólimin, Almaly, Jetisý, Áýezov, Bostandyq aýdandyq bólimshelerin basyp almaq bolǵan.
Qarý-jaraq pen áskerı tehnıkany tartyp alý maqsatynda Qorǵanys mınıstrliginiń áskerı bólimderine shabýyl jasaý áreketi jasaldy. Almatynyń Halyqaralyq áýejaıy basyp alyndy.
Qańtardyń 6-sy men kúni búginge deıin kúsh qurylymdary lańkestikke qarsy operasıa júrgizýde.
«Azamattardy májbúrli shekteýlerge shydamdylyqpen qaraýdy suraımyn, sabyrlyq saqtaýǵa, ásirese antıterrorlyq operasıalar júrgizilip jatqan jerlerde qaýipsizdik sharalaryn saqtaýǵa shaqyramyn. Arandatýshylyqqa boı aldyrmaı, barlyq kúdikti faktiler men adamdardy polısıaǵa habarlańyz, sol arqyly qalamyzdaǵy tártipti qalpyna keltirýde quqyq qorǵaý organdaryna úlken kómek kórsetesiz», - dedi Qanat Taımerdenov almatylyqtarǵa.