Mektep pen balabaqsha tapshy
Prokýratýra Bostandyq aýdanyndaǵy iri turǵyn úı keshenderiniń birin salýshyǵa qatysty sotqa talap aryz berdi, dep habarlaıdy Almaty-akshamy.kz Inform.kz-ke silteme jasap.
Qadaǵalaý organy turǵyndar shaǵymynan keıin Sátbaev kóshesi, 26/4 mekenjaıy boıynsha turǵyn úı keshenin salý kezinde sáýlet normalarynyń saqtalýyna taldaý júrgizdi.
«Prokýrorlar halyqtyń tyǵyz ornalasýy men nysannyń qurylysy qoldanystaǵy normalardyń ruqsat etilgen shekti parametrlerinen asyp túsetinin, sondaı-aq bilim berý nysandaryna júkteme bary eskerilmegenin anyqtady», - delingen vedomstvo habarlamasynda.
Bul rette qurylys kompanıasy óz mindetine 900 oryndyq mektep salýdy alǵan bolyp shyqty. Alaıda, bul nysannyń aınalasynda qazirdiń ózinde 2 274 orynǵa jalpy bilim beretin mektep pen balabaqsha tapshy. Demek, qurylys kompanıasy mektepti salǵannyń ózinde 1 374 oryn jetispeıtin bolady. Sonymen qatar, qurylys normalary men erejelerin buzýdyń basqa da faktileri anyqtaldy.
«Osyny eskere otyryp, Bostandyq aýdanynyń prokýratýrasy Almaty qalasynyń josparlaý jáne ýrbanıstıka basqarmasynyń eskızdik jobany kelisý boıynsha áreketin zańsyz dep taný týraly sotqa talap aryz berdi. Prokýratýra yqshamaýdan turǵyndarynyń shaǵymyna sáıkes bul nysan qurylysynyń tujyrymdamasyn qaıta qaraý qajet dep sanaıdy», - delingen habarlamada.
Eske salsaq, QR Bas prokýratýrasy men Sybaılas jemqorlyqqa qarsy qyzmet «ÓKM operatory» shotyna salynǵan shekteýlerdi alyp tastady.