Forbes Qazaqstan eldiń eń yqpaldy 50 bıznesmeniniń jyl saıynǵy reıtıńin jarıalady.
Reıtıń avtorlary tizimniń basynda alǵash ret osy ýaqyt ishinde bir-birimen birinshi oryndy bólisip kelgen Tımýr Qulybaev pen Bolat Ótemuratovtyń tizim basynan ketkenin atap ótken, dep habarlaıdy Almaty-akshamy.kz Ulysmedia.kz-ke silteme jasap.
«Birinshi reıtıńten bastap ondaǵy eń joǵarǵy oryndy kezekpen Tımýr Qulybaev nemese Bolat Ótemuratov ıelenip keldi. Mine, on úshinshi retke kelgende kóshbasshynyń sary jeıdesi basqa bireýge ótti. Bıyl tizimdi Kaspi.kz negizin qalaýshy jáne úsh iri aksıonerdiń biri, 54 jastaǵy Vácheslav Kım bastady. On úsh jyl buryn ol 15-shi orynda bolatyn», - delingen basylymda.
Sondaı-aq, úzdik 50-lik alty jańa esimmen tolyqqany anyqtaldy. Olardyń qatarynda Kusto Group boıynsha Erkin Tátishevtiń seriktesi, YPO Kazakhstan-nyń jańa tóraǵasy bolyp saılanǵan jáne «Báıge» ulttyq federasıasyn basqarǵan 47 jastaǵy Qanat Kópbaev bar.
Sondaı-aq, tizimnen belgili kásipker Rashıt Sársenovtyń 38 jastaǵy uly – Eldar Sársenov te kórindi, oǵan buryn ákesine tıesili Nurbank pen «Vıktorıa»saqtandyrý kompanıasyndaǵy majorıtarlyq úlester aýysty.
Respublica parlamenttik partıasynyń 39 jastaǵy tóraǵasy jáne VIII shaqyrylymdaǵy Parlament Májilisiniń depýtaty Aıdarbek Qojanazarov alǵash ret reıtıńten kórindi.
Qaltalylar tiziminde Qulybaevtardyń isker seriktesi jáne olardyń bıznes-ımperıasyndaǵy kóptegen iri qurylymdardyń basshysy 61 jastaǵy Raýshan Saǵdıeva da bar.
«Alǵashqy 50-likke qaıtyp kelgender arasynda yqpaldy bıznesmenderdiń biri Ǵalymjan Esenovtyń keısi erekshe qyzyq bolyp otyr, ol onyń ATF banki men Jusan banki aksıalaryn aıyrbastaǵannan keıin tizimnen shyǵyp qalǵan bolatyn», - delingen basylymda.
Úzdik ondyqqa Bolat Ótemuratov, Tımýr Qulybaev, Vladımır Kım, Tımýr Týrlov, Aleksandr Mashkevıch, Nurlan Smaǵulov, Aıdyn Rahymbaev, Aleksandr Belovıch, Edýard Ogaı kirdi.
Reıtıń- Forbes Kazakhstan jýrnalısik basylymynyń jasaǵan baǵa berýi jáne ony qujat nemese resmı aqparat retinde paıdalanýǵa bolmaıdy.
Vácheslav Kım — Kaspi Bank ıeleriniń biri, álemdik reıtıńte 1513-ten 787-orynǵa kóterildi. Onyń kirisi bir jyl ishinde eki esege jýyq ósti. Eger ótken jyly Kımniń tabysy 2 mıllıard dollardy qurasa, bıylǵy jyly ol 3,6 mıllıard dollarǵa jetti.